Germanıada Tómengi Saksonıa jerinde 91 jastaǵy qart áje poıyz astyna túsip, aman qaldy. Ol kenetten paıda bolǵan poıyzdyń soqqysynan qutylý úshin relsterdiń týra ortasyna jata qalǵan, - dep habarlaıdy Qamshy.kz baq.kz -ke silteme jasap.

The Local basylymynyń málimetteri boıynsha, aldynda tireýish arba súıregen keıýana relsterdi Langvedel temirjol stansasynda keship ótpek bolǵan. Alaıda saǵatyna 160 shaqyrym jyldamdyqpen jyljyǵan poıyz ájeniń joldan ótýine kedergi keltiripti. Poıyzdan qashyp qutyla almaıtynyn sezgen qart áıel relsterdiń týra ortasyna jatyp alyp, arbasyn óziniń ústine qoıady.

Basylym habarlaǵandaı, ekspress poıyzdyń júrgizýshisi soqqyny estigen, biraq jabaıy ańdy qaqtym dep oılapty. Kóliktiń qanshalyqty zaqymdanǵanyn tekserý úshin toqtap, tysqa shyqqan mashınıst poıyzǵa ilinip qalǵan arbany kóredi.

Keıin týra sol jolmen kele jatqan kezekti poıyzdyń júrgizýshisi alda jatqan qart ájeıdi aldyn ala ańǵaryp, toqtap, jedel járdem shaqyrǵan. Qazir 91 jastaǵy ájeniń ómirine esh qaýip tónip turǵan joq.

Polıseıler mundaı jaǵdaıda aman qalý ekiniń birine buıyra bermeıtin múmkindik deıdi. Sebebi relsterdiń týra ortasynda jatqannyń ózinde aýyr jaraqat pen ajaldan qutylý neken-saıaq. Adamdy poıyz basyp, nemese kóliktiń shyǵyp turǵan bólshekteri kıimin ilip ketý qaýpi basym.