Ustaz, Almaty qalasy Ortalyq meshitiniń naıb ımamy Ersin Ámire óziniń áleýmettik jelilerdegi paraqshalarynda eldegi teris aǵymdardy, onyń ishinde sáláfızm aǵymyn ustanýshylardy únemi áshkereleýmen keledi. Keshe E. Ámire salafıtterdi madhalıt, sýrýrıt, takfırıt dep úshke bólýdiń durys emestigin, bul aǵymnyń qaı-qaısysy bolmasyn radıkaldy maqsattar kózzdeıtinin áshkerelegen jazba jarıalady.

«Mynaý sáláfılerdiń madhalıti de, sýrýrıti de, takfırıti de moıyndaıtyn Saýd Arabıa patshalyǵynyń sheıh Ibn Bazdan aldyńǵy mýftıi, Mýhammad ıbn Abdýlýahhabtyń shóberesi sheıh Mýhammad ıbn Ibrahım Álý ásh-SHeıhtiń pátýasy. Ol kisige «Úkim shyǵarýda sharıǵatty emes, zańdy basshylyqqa alatyn eldi tastap ketý (hıjrat jasaý) kerek pe?», «Namaz oqymaıtyn adamdarmen bir shańyraqta ómir súrýge bola ma?» - degen suraqtar joldanǵan. 
Ol kisi birinshi suraqqa: «Zańmen basqarylatyn el Islam eli bolyp tabylmaıdy. Ol jerdi tastap ketý (hıjrat jasaý) ýájip», - dep jaýap berse, ekinshi suraqqa: «Ondaı adamdarmen bir shańyraqta ómir súrýge bolmaıdy. Olarǵa nasıhat etý kerek. Nasıhatty qabyldamasa olardy tastap ketý kerek», - degen jaýap aıtqan. Elimizden Sırıa, Irak, Aýǵanstan sekildi elderge hıjrat jasaǵan nemese ata-analarymen bir úıde ómir súrýden ıakı bir dastarhanda otyryp as ishýden bas tartqan sáláfılerdiń osy sheıhtyń pátýasyn almaǵandyǵyna kim kepil? 

Eldegi «Baısaldy sáláfılerde problema joq. Problemanyń barlyǵy Sáıd Qutyppen áserlengen tákfırlerde. Shynaıy sáláfılikten elimizge tóner eshqandaı qaýip joq. Olar shybynǵa da zıan keltirmeıdi», - dep saıraıtyn ekspertsymaqtarǵa suraq: «Sheıh Mýhammad ıbn Ibrahım Álý ásh-SHeıh bilimdi qaıdan aldy?», - degen ustaz Ersin Ámire jazbasynyń sońynda paıdalanǵan derekkózderin de kórsetken.

Mýhammad ıbn Ibrahım Álý ásh-SHeıh. Fátáýa ýá rásá-ıl. - Mekke qalasy: Úkimet baspa úıi, 1399 h.j. VI tom. Qajylyq, jaqsylyqqa buıyryp, jamandyqqa tyıym salý jáne jıhad kitaby. 188-190 better. Pátýa №1451, 1453.