Shildeniń 1-i kúni Belarýsıa resmı túrde ulttyq valúta birlikterine denomınasıa jasady (Denomınasıa (ekonomıkada) - bul qaǵaz aqshanyń baǵaly kaǵazǵa ózgerýi; kóbinese eldiń aqsha birliginiń irilenýi jáne eski qaǵaz aqsha belgileriniń aqsha qatynasyn retteý maqsatynda jańaǵa naqty sáıkestendirý boıynsha aýystyrý).
2000-shy jyldary qoldanysqa engizilgen Belarýsıanyń eski aqshasy endi aınalymnan shyǵady. Onyń ornyna 4 nóldik kórsetkishi qysqarǵan nemese somasy irilengen jańa belarýs aqshasy qoldanysqa engiziledi,-dep habarlaıdy «dw.com» portaly. Sondaı-aq, endi Belorýsıa Ulttyq banki qaǵaz aqshamen qatar, tıyn aqshalardy da paıdalanatynyn málimdedi.
Belorýsıa Ulttyq bankiniń habarlaýynsha, qoldanysqa engen banknottar 7 nomınal boıynsha qaǵaz jáne 8 nomınal boıynsha tıyn bolyp bekitildi.
Árbir banknotta Belorýsıa Respýblıkasynyń oblystary beınelengen eken. Mysaly, Brest, Vıtebsk, Gomelsk, Grodnensk, Mınsk jáne Mogılevsk oblystary Ulttyq valútada keremet kórinis tapqan.
Eski ám jańa odaqtasymyzdyń (Kedendik jáne Eýrazıalyq ekonomıkalyq odaq) biri – Belorýsıa Respýblıkasy qoldanysqa engizgen ulttyq valútasynyń eń basty ereksheligi – osyǵan deıin bolǵandaı, orys tilinde birde-bir sóz jazylmaǵan. Osylaısha Belorýsıa resmı valútasynan orys tilin alyp tastaǵan. Al eski aqsha 2016 jyldyń jeltoqsan aıyna deıin qoldanystan tolyq shyǵarylmaq. Bul Belorýsıa Respýblıkasynyń 1991 jyly Egemendik alǵan ýaqytynan bergi úshinshi ret júrgizip otyrǵan denomınasıasy.
Egemendiktiń 25-inshi jylynda Belorýsıa Respýblıkasy ulttyq valútadaǵy orys tilinen birjolata bas tartty.
Salystyrmaly túrde qaraıtyn bolsaq, Belorýsıa slaván tobyna jatatyn, orys halqymen jaqyn týys ult bolyp keledi. Jáne qazirgi tańda Belorýsıa azamaty retinde tirkelgen 9,5 mıllıon halyqtyń 9,8 paıyzyn orys ulty quraıdy.
EAEO jáne KO aıasynda odaqtasyp otyryp-aq, Belorýsıanyń osyndaı qadamǵa barýy, qos ıntegrasıa aıasynda qysym jasap, menbilemdik saıasat júrigizip otyrǵan Reseıdiń agresıasy kúsheıetin bolsa, keshegi EO-dan bir-aq kúnde shyǵyp ketken Ulybrıatanıa sekildi EAEO-dan bólinip ketýge qaýqarly ekendigin kórsetse kerek.
Al Táýelsizdigi Belorýsıamen túıdeı qurdas Qazaqstannyń Memlekettik valútasynda áli kúnge syńarlasyp kele jatqan Reseıdiń memlekettik tilindegi jazýdy qurtýǵa quzyrly bılik qulyqsyzdyq tanytyp otyrǵany jasyryn emes.
Nurzat Toǵjan, Abai.kz
