Shildeniń ortasy bolsa da qaýyn-qarbyz jeýge áli erte. SES mamandary osylaı dep dabyl qaǵyp jatyr, - dep habarlaıdy Qamshy.kz 31 arnaǵa silteme jasap.

Aıtýlarynsha,  qarbyzdardyń quramyndaǵy ýly nıtrattardyń mólsheri tym kóp. Al jol jıegindegi satylyp júrgenderi tipti qaýipti. Bul oryndardaǵy taýarlar tazalyq talaptaryna múldem saı kelmeıdi dedi.

Qarbyzǵa tolǵan myna dúńgirshek birneshe jyldan beri osy jerde turǵan.  Kásibinen násip taýyp kelgender,   bul jerde ruqsatsyz saýda jasaǵan. Tekseris  keledi  degendi  aldyn ala estidi me, áıteýir qoıjaıyndary bul jerde tóbe kórsetpedi.  Al pármeni kúshtiler taýardyń ıesin kútpeı, quramy «qaýipti» qarbyzdardy  tıep alyp, dúńgirshekterdi  buzyp tastady.

Asyǵys qımyldaǵan arnaıy jasaq jol jıeginde jemis jıdekpen kókónis satyp turǵan birneshe núktege toqtady. Saýdagerlerdiń susyn qashtyrǵan quzyrlylar eshkimdi de aıamaı bárin qatań jazalady.

Alaıda aǵalary kelmedi bul jigittiń. Taýary túgel tárkilenip alyndy. Ákimshilik pen SES mamandary birigip júrgizgen reıd nátıjesinde jalǵyz bul jigittiń emes, kóptegen  satýshylar tarapynan  birneshe zań buzýshylyqtar anyqtaldy. Satyp turǵan taýarlarynyń sapasyna da kúmán keltirdi mamandar.

MERÝERT QASYMOVA, Almaty qalasy TQQD bas mamany:

- Infeksıalyq aýrýlar juqtyryp alýyńyz múmkin. Gastroentrokolıt, salmanelez, túrli toksıkalyq ınfeksıalar taralady.  Saýdagerler tazalyqty múldem saqtamaıdy. Jol jıeginde turyp, búkil shań-tozań, kólikterdiń ýly gazdary osylarǵa sińip ketedi.

Qaýyn qarbyz ózgede jemis jıdekti áli jeý erte. Óıtkeni quramynda nıtrattardyń mólsheri shamadan tys. Naǵyz qarbyzdar tek shildeniń aıaǵy men tamyz aılarynyń basyna qaraı pisedi eken. Bolmasa úlken dúkenderden satyp alǵan jón. Al densaýlyqqa zıany bolmasyn deseńiz, jol jıegindegi jabaıy saýdaǵa múldem jolaýdyń qajeti joq deıdi mamandar.