Aqtóbe qalasynyń №2 sotynda Sırıaǵa attanbaq bolǵan 12 aqtóbelikke qatysty úkim shyqty, - dep habarlaıdy Qamshy.kz Tengrinews.kz  -ke silteme jasap.

Olardyń eń kishisi 20 jasta, úlkeni 57-de. Sot úkimimen olar aýyr qylmys jasady dep tanyldy, naqtyraq aıtqanda lańkestik toptyń qyzmetine nemese onyń jasap jatqan terorıstik aktilerine qatysýǵa oqtalý, lańkestik jáne ekstremıstik qyzmetin qarjylandyrý jáne terorızmge nemese ekstremızmge astyrtyn dem berýshilik jasady dep tanyldy. Sot úkimimen 12 adam kináli dep tanylyp, 6 jyldan 8 jylǵa deıin bas bostandyǵynan aıyryldy. Olardyń múlki tárkilenedi.  

Aqtóbe, Aqmola, Qyzylorda oblystarynyń turǵyndary Sırıaǵa baryp, DAISH lańkestik uıymynyń quramynda qarýly qaqtyǵystarǵa, sonymen qatar olar jasap jatqan aktilerge qatyspaq bolǵan. Olar óz josparyn júzege asyrý úshin lańkestik uıymnyń múshelerimen Internet arqyly baılanysqa túsipti. Bul maqsatta olar Ózbekstan men Qyrǵyzstan azamattarynyń atyna qoldan kýálik jasaǵan. Sonymen qatar, sot bir sottalýshynyń olarǵa qarjylaı kómek kórsetkenin anyqtady. 

Eske salaıyq, bıyl 19 aqpanda Aqtóbede dinı ekstremıstik toptyń 12 múshesi ustalǵan bolatyn. Oblystyq prokýratýradaǵylardyń aıtýynsha, olar Sırıaǵa baryp, qarýly qaqtyǵystarǵa qatyspaq bolǵan. Olardyń isine baılanysty sotqa deıingi óndiris bastalǵan edi.