QR Mádenıet jáne sport mınıstrliginiń Mádenıet isteri jónindegi departamentiniń dırektory Aqtoty Raıymqulova "Fenıks" fılminiń rejıseri Talǵat Jánibekov pen mınıstr Arystanbek Muhamedıulynyń arasynda shyqqan daýǵa qatysty pikir bildirdi, - dep habarlaıdy Qamshy.kz Tengrinews.kz -ke silteme jasap.

Aıta keteıik, daý 2015 jyldyń maýsymynda shyqqan edi. "Fenıks" fılmin túsirýshiler Qazaqstannyń Mádenıet jáne sport mınıstrligin túsirilim jumystaryn úzip tastady dep aıyptaǵan edi. Keıin olar Arystanbek Muhamedıulyn reseılik-amerıkalyq Aldamisa Entertainment kompanıasymen birikken "Fenıks" jobasy toqtap qalǵanyna baılanysty aıyptaǵan edi. Taıaýda rejıser Talǵat Jánibekov Muhamedıuly bopsalaýmen aınalysty dep málimdep, vıdeo jarıalaǵan bolatyn. Aıtýynsha, mınıstr fılmdi qarjylandyrý úshin aqsha suraǵan.

"Qoǵamnyń árbir múshesiniń óz pikiri bar. Mınıstrlik mádenıet salasyndaǵy quzyrly organ. Taqyryptyq máseleler - taǵaıyndaý, damytý, toqtatý jumystaryn kınoóndiristiń negizgi fabrıkasy sanalatyn "Qazaqfılm" iske asyrady. Olardyń sheshimi sarapshylar komıtetiniń sheshimine negizdelgen. Bul shyǵarmashylyq máseler jáne ony kınostýdıa sheship, mınıstrlikke usynady. (...) Aıtylǵan aıyptaýlardyń barlyǵyn zańgerler men til mamandary zerttep jatyr. Nátıjesi keıin usynylady", - dedi Raıymqulova qazaqstandyq kınematografıanyń damý konsepsıasy talqylanǵan dóńgelek ústeldiń úzilisinde.

Bastapqyda dóńgelek ústelge mınıstr Muhamedıulynyń ózi kelýi kerek bolǵan, alaıda ol jumys kestesiniń qaýyrttyǵyna baılanysty sharaǵa qatysa almapty.