Qazaqstan Respýblıkasy Ulttyq ulany «Ońtústik» óńirlik qolbasshylyǵyna qarasty 5513 áskerı bóliminiń bazasynda óńirlik qolbasshylyq áskerı bólimderiniń jergilikti ult ókili emes áskerı qyzmetshileri arasynda «Memlekettik til – meniń tilim!», memlekettik tildi engizýge jaýapty mamandar arasynda «Úzdik maman», memlekettik tildi oqytý kabınetteriniń materıaldyq bazasyn molaıtý jáne úzdik tájirıbelerdi bólisý maqsatynda «Úlgili qazaq tili kabıneti» baıqaý-saıystary ótkizildi, - dep habarlaıdy Qamshy.kz.
Qazaq halqy qalyptasqaly bergi dáýirde qanshama taǵdyrdyń tezinen, tozaqtyń ózinen aman ótip, búgingi kúnde «memlekettik til – qazaq tili» degen uǵymǵa ıe bolǵan ana tilimiz – ótken tarıhymyzdyń birden-bir jemisi. Óıtkeni osy mártebege jetý úshin qazaq eli san soqpaqtan súrinbeı ótip ter tókti, sol eńbekpen aqqan teri aqtaldy da. Sebebi Qazaqstan Respýblıkasynda mekendep jatqan san túrli ulttardyń barlyǵy derlik qazirgi ýaqytta qazaq tilin úırenýge zor talpynys bildirip júr.
Memlekettik tildi úırenýge degen ynta-jiger Ulttyq ulanda da óz nátıjesin berip kele jatyr. Buǵal dálel retinde, búgingi ótken saıysty aıtyp ótýge bolady. Baıqaý barysynda qatysýshylar qazirgi zamandaǵy memlekettik tildiń mańyzdylyǵyna basa toqtala otyryp, qazaqsha maqal-mátel jattaý, sóz jarysy, qazaqsha kórinis qoıý sekildi nomınasıalar boıynsha básekege tústi. Bir qýanarlyǵy, olardyń barlyǵy derlik baıqaýǵa mol daıyndyqpen kelgendigin kórsetti. Saıysqa óńirlik qolbasshylyq áskerı bólimderinen 12 áskerı qyzmetshi qatysty. Baıqaýǵa Ulttyq ulan Bas qolbasshylyǵynyń ofıserleri, tilshi mamandar men kórnekti ádebıet ókilderi qazylyq jasady jáne ádil-qazylardyń sheshimi boıynsha úzdik dep tanylǵan 4 áskerı qyzmetshi júldeli oryndarǵa ıe boldy.
Atap aıtsaq, osy saıysta top jarǵan 5513 áskerı bóliminiń áskerı qyzmetshisi, túrik ultynyń ókili kishi serjant Kamran Fazaırov 1 orynǵa ıe boldy. 2 orynǵa ıe bolǵan 6506 áskerı bóliminiń áskerı qyzmetshisi, ózbek ultynyń ókili serjant Erkınbaı Shamýratov ta memlekettik tildi bilý deńgeıiniń osal emestigin kórsetti. 3 oryndy qanjyǵasyna baılaǵan 5547 áskerı bóliminiń áskerı qyzmetshisi, orys ultynyń ókili kapıtan Mıhaıl Mıskıv pen 5572 áskerı bóliminiń ofıseri, ózbek ultynyń ókili maıor Nurjan Sadyqov ta atalǵan baıqaýda sóz sheberligin tanytýda aldyna jan salmaı, maqal-mátel jarysynda kózge túsip, barsha jınalǵan qaýymdy bir tánti etip tastady. Kórermen kózaıymyna aınalǵan saıys jeńimpazdary baıqaý qorytyndysy boıynsha baǵaly syılyqtarmen jáne Ulttyq ulan «Ońtústik» óńirlik qolbasshylyǵy qolbasshysynyń gramotasymen marapattaldy.
Osyndaı kıeli ultymyzdy ydyratpaı, talaı tarıhı taǵdyrdyń tarazysynan tapjylmaı ótken memlekettik til – qazaq tili qashan da eldigimizdiń, birligimizdiń, hám uly Táýelsizdigimizdi qorǵaý jolynda ultymyzdyń tegeýrindi tetigi bolýy tıis!
Aıdos Baıshaǵyrov,
«Ońtústik» óńirlik qolbasshylyǵynyń Baspasóz qyzmeti
