Qazaqstandyq ınternet qoldanýshylarynyń arasynda óte tanymal Yvision.kz blog-platformasynda Dana (Dana1992) esimdi qoldanýshynyń blogy qyzý talqyǵa tústi. Ózin iri kásipkerdiń toqaly dep tanystyrǵan Dana esimdi boıjetken áıel bolýdan toq toqal bolǵan artyq ekenin túsingenin aıtady.
Astanadan Almatyǵa jumys babymen kelgen kásipkermen tanysqan boıjetken, birneshe kezdesýden keıin onyń otbasyly ekenin biledi. Alaıda qarym-qatynasyn úzbeıdi, "kóńildesim bol" degen er adamnyń usynysyn qabyldap, erke toqal qalaǵanyn jasatatyn jaǵdaıǵa jetedi.
"Áıelge tán qalaýymnyń barlyǵyn ońaı-aq alamyn. Sómke, týflı nemese odan da qymbatyraq zatty ala alamyn. Osy ýaqyttan beri kólik aldyq, shetelde demaldyq. Onyń kómegimen bir bólmeli páterimdi jańadan salynǵan úıdegi páterge aýystyrdyq. Árıne, jóndeýin de ózi kóterdi. Onyń tonnalap syılap jatqan áshekeı-buıymdary jaıly aıtýdyń ózi artyq" degen kóńili toq toqal ózi qatarly jas jigitterge tek jas kezinde qyzyqqanyn, qazir otbasyly bolsa da, qaltaly azamattardyń unaıtynyn aıtady.
"Eresek erkekterde aqsha da bar, aqyl da bar, áıeldermen ózin qalaı ustaý kerektiginen tájirıbe de jetkilikti", - dep jazady Dana.
"Túsinesizder me, onyń Astanada mıyn jeıtin áıeli, yǵyryn shyǵaratyn bala-shaǵasy bar. Al maǵan Almatyǵa kelgende lázzatqa batyp demalady. Biz onyń otbasy, jumysy týraly talqylaımyz. Arnaıy jerlerge qoltyqtasyp birge baramyz. Sondyqtan oǵan eki áıelmen de yńǵaıly dep oılaımyn" dep jazady toqal dana.
Jáne kóńildesi Astanada óz otbasynyń janynda kezinde basqa jigittermen kóńil kóteretinin jasyrmaǵan boıjetken bul isine uıalmaıtynyn da ashyq aıtty.
Dana óz otbasynyń bul isten habary joǵyn, tek qaltaly súıiktisi baryn ǵana biletinin aıta kele, "men sıaqtylar tozaq otynan da qutylýdyń amalyn tabady" dep maqtanyp ta alǵan.
Jeli qoldanýshylarynyń bir tarapy boıjetkendi aqylǵa shaqyrsa, endi bir tarapy qoldaıtyndaryn bildirgen. Tipti arasynda bul áńgimeniń ótirikke qurylǵanyn aıtatyndar da bar.
Osy oraıda "Qamshy" portaly óz oqyrmandaryn ekinshi áıeldi zańdastyrý men toqal máselesin birge talqylaýǵa shaqyrady.
