Patshalar ańǵarynda júrgizilgen qazba jumystary kezinde tabylǵan súıek bizdiń zamanymyzǵa deıingi III-IV ǵasyrlarda ómir súrgen áıelge tıesili, - dep habarlaıdy Qamshy.kz Skifnews.kz-ke silteme jasap.

Asa qundy jádigerler arheologıalyq aýmaqtaǵy №2 qorǵannan tabyldy. Ǵalymdar bul jerde sensasıalyq jańalyqtyń bolaryn osydan úsh jyl buryn aıtqan ekn. Tabylǵan adam súıegin arheologtar saq hanshaıymy ekenin aıtyp otyr. Adam múrdesimen birge ǵalymdar qorymnan túrli jádigerler jáne jeti jylqynyń súıegin de qazyp alypty. Bul jerlengen áıeldiń asa tekti tuqymnan ekenin kórsetedi deıdi olar.

Qatoń-Qaraǵaı aýdanyndaǵy Patshalar ańǵarynda osymen birneshe jyl qatarynan aýqymdy arheologıalyq qazba jumystary júrgizilip keledi. Bul jerde Álkeı Marǵulan atyndaǵy arheologıalyq ınstıtýttyń basty ǵylymı qyzmetkeri Zeınolla Samashev bastaǵan otandyq jáne sheteldik mamandar zerteýmen aınalysyp jatyr.

"Biz áli qazba jumystaryn aıaqtaǵan joqpyz, biraq tapqan dúnıelerimizden dereý mýzeı jasap jatyrmyz. Mýzeı ǵylymynda bul alǵashqy jaǵdaı. Endi Berel qorǵany jaıly barlyq málimetti, onda tabylǵan jádigerler týraly tek ǵalymdar ǵana bilip qoımaıdy, sonymen qatar, búkil qyzyqqan azamattardyń da oǵan qoly jetimdi. Qorǵanǵa kelgen kez-kelgen adam bizdiń ata-babalarymyzdyń baı tarıhynan habardar bolyp, barlyǵyn da óz kózimen kórip qaıtady", - deıdi Z.Samashev.

Aıta keteıik, SHQO-da qazirgi tańda aspanasty mýzeıin salý jumystary júrip jatyr. Negizgi jádigerlerdiń biri №2 qorǵan bolmaq.