Aýylda Aqlıma degen apamyz boldy. Ol kisi kórshi ájeımen tatý qurby edi. Kórshi áıel Aqlıma apaǵa jıi-jıi  kelip, áńgimelesip, syr bólisip otyratyn. Aqlıma apa qyz uzatyp, kelin túsirgen, úlken shańyraqtyń shamshyraǵyn tutatyp otyrǵan elge syıly ájeı. Kórshi apanyń da uldary úılengen, qyzdary turmysta. Ózi úlken ulymen jáne kelinimen turady. Úsh nemeresi bar. Kórshi apa birde Aqlıma ájeıge muńaıyp otyryp kelinine qatysty mynandaı jaǵdaıdan habardar etipti.

Ol kisiniń kelini Zıash syrt kózge ósek aıtpaıtyn, dóreki minezi joq, jaıbaraqat áıel kóringenmen, jaqynyraq aralasqan adam bylapyttyń naq ózi ekenin biletin. Salaq ekeni sonsha, bylǵanǵan ishkıimin kúıeýiniń taza kıimderimen qosyp, bir shıfonerge salady eken. Onyń bul áreketin baıqaǵan enesi «Qaraǵym-aý, butkıimińdi aýystyrǵan soń birden jýý kerek qoı. Kúıeýińniń taza kıimderi turatyn shıfonerge nege salasyń?» dese, «Qaıta-qaıta jýyp otyramyn ba? Gıgıenalyq kúnderim kelgende, bylǵanǵan ishkıimimdi jatyn bólmede aýystyryp, shıfonerge tyǵa salamyn. Apta sońynda kir jýatyn kezde, bárimizdiń kıimderimizben qosyp, jýamyn ǵoı. Onda turǵan ne bar?» deıdi eken. Áıel adam ishkıimin kúıeýi men balalarynyń kıimderimen qospaı,  bólek legenge  jýý keregin aıtsa da kelini qolyn bir siltepti.

Birde enesi Zıash úıde joq kezde ulyna taza jeıdesin ápereıin dep, olardyń jatyn bólmesindegi shıfonerdiń esigin ashyp qalǵanda shoshyp ketedi. Zıash ózinen shyqqan gıgıenalyq las zattardy búktep, jeıdelerdiń qasyna qoıypty. Kelini kelgende enesi jeke shaqyryp alyp: «Shyraǵym, áıel adam jeke bas tazalyǵyn saqtamasa tóńiregindegilerge kesiri tıetinin bilmeýshi me ediń? Tán tazalyǵyn saqtaý qajet, sonymen birge jeke basyńnyń bylapyt nárselerin ózgelerge kórsetý jaı ǵana uıat emes, sumdyq zıandy áreket. Sen ózińniń kúıeýińniń densaýlyǵyna nuqsan keltirip otyrsyń. Túsinesiń be? Onyń ómirine zıan tıgizip otyrsyń, álgindeı áreketterińmen» dep aqyl aıtady.

Biraq eneniń kelinine aıtqan paıdaly keńesteri aıtqan jerinde qalyp qoıady. «Gıgıenalyq bylǵanysh zatty qoqysqa aparýǵa erindim, ári sol sátte qonaqqa barýǵa daıyndalyp, asyǵys boldym. Keshke asúıdegi tamaq qaldyqtarymen qosyp tastaımyn ǵoı» depti. Osylaısha sóz uqpaıtyn Zıash zıan jasaýyn toqtatpaıdy. Enesi kelinin tazalyqqa esh úırete almaıdy.

Kórshi apa eshkimge eshqashan qatty ursyp jekimeıtin. Kelinine aqylyn de jumsaq únmen, mádenıetti túrde jetkizgen ǵoı. Ony túsiner kelin bolsashy?! Ol kisiniń muńyn shaǵar jalǵyz jaqyn abysyny kórshisi Aqlıma áje edi. «Ulymnyń túbine jetetin boldy, bul qatyn» dep, kózine jas aldy. «Qaıteıin, kórgeni joq salaq qoı» dep egilip otyr» dedi birde ol kisi týraly Aqlıma áje.

Kórshi ájeı tazalyǵy joq kelinnen beker úreılenbepti. Zıashtyń kúıeýi qyryqqa da tolmaǵan shaǵynda sebepsizden sebepsiz, malqoraǵa baryp ózine ózi qol jumsapty.

Óte aqkóńil, jaıdary jigit edi. At ústinde keremet oınaıtyn. Búkil aýyldyń balalary jınalyp, odan at ústinde trúkter jasaýdy úırenetin. Sondaı marqasqa jigittiń túbine tazalyǵy joq salaq áıeli jetti degendi aýyldaǵy apalar áli kúnge aıtyp otyrady. «Olaqtan salaq jaman» dep qazaq bekerge aıtpaǵan ǵoı.

Dana Qamshybek