El táýelsizdigin qorǵaýǵa barshamyz atsalysaıyq!

Qadirli Otandastar!

“Eldigimizdiń erteńi ne bolmaq? San ǵasyrlar boıy ańsaǵan, ata-babamyzdyń armanyna aınalǵan Táýelsizdikti saqtaı alamyz ba?” degen másele tótesinen qoıylǵan kezeńge tap boldyq. Halqynyń sany Qazaqstannan úsh ese úlken Ýkraınanyń Qyrymyn Reseı úsh aptada tartyp alǵanyn kórgende “bizdiń taǵdyrymyz qandaı bolar eken?” dep oılanbaǵan sanaly azamat joq shyǵar, sirá. “Qoryqqanǵa qos kórinedi” deıdi qazaq, sondyqtan, árıne, óz-ózimizdi úrkitip, úreı­lendirip, shoshytýdyń qajeti az, biraq, “saqtansań, Qudaı da saqtaıdy” degen sóz taǵy bar. Demek, saqtanýy­myz, qorǵanýymyz, oılanyp, bolyp jatqan jaıttardy sarapqa salyp, erteńgi kúnimizge, memleket­tiń bolashaǵyna zer salyp qaraǵanymyz abzal. Al eger aqylymyz, kóregendigimiz bolsa, onda, eń birinshi kezekte, Kreml­diń ımperıalyq ambısıasynan týyndaǵan Eýrazıalyq ekonomıkalyq odaqqa qosylýdan bas tartýymyz kerek! Halyqtyń arasynda “Ke­dendik odaq – kesirli odaq” degen sóz bar. Mine, sol “kesirli odaqtan” soń Eýrazıa­lyq odaq dep atalatyn táýelsizdikke qaterli “keri ketken odaqqa” qosylýdyń ne qajeti bar?! Onyń ústine, áli kúnge deıin “Eýrazıalyq ekonomıkalyq odaqqa qandaı sharttarmen kiremiz? Budan ne utamyz, neden utylamyz? Táýelsizdikke qater tóne me, tónbeı me?” degen saýaldardyń birde-bireýine jaýap berilgen joq! Eýrazıalyq ekonomıkalyq odaq qujattary halyqtyń, qalyń kópshiliktiń talqysyna da salynbady! Ne sebepti jabyq, jasyryn, qu­pıa túrde ustap otyr bul qujattardy? Eger táýelsizdikten aıyrylsaq, bul tarıh pen urpaq aldynda keshirilmes kúná bolatyny daýsyz. Babalarymyz shym-shytyryq, qıly zamanda qasyq qany qalǵansha eldi­gimizdi, táýelsizdigimizdi, je­rimizdi, memleketimizdi qorǵap keldi, ony bizge saqtady. Al biz el aman, jurt tynyshta, halyqaralyq zańnamalar ju­mys isteıtin órkenıetti zamanda táýelsizdigimizdi óz qolymyzdan bergenimiz – baryp turǵan qasiret bolmaı ma! Osy sebepti, biz, Qazaq eliniń zıaly qaýym ókilderi men qoǵam qaıratkerleri Eýrazıalyq ekonomıkalyq odaqqa kirýden bas tartýdy talap etemiz! Kremldiń ıntegrasıalyq jobalary týraly buǵan deıin de talaı saıasatkerler, saıasattanýshylar, qoǵam qaırat­kerleri, jýrnalıser, qatardaǵy azamattar kóp aıtty, onyń qateri týraly talaı dálel-dáıekter keltirildi. Qoǵamda “bul odaqqa qarsy narazylyq tanytaıyq!” degen pikirler de aıtylyp jatyr. Onyń barlyǵyn da estip, bilip otyrmyz. Osyndaı úndeýler­diń ishinde shoqtyǵy bıik bolyp kórinip turǵany – 12 sáýir kúni Almatyda ótetin Antıeýrazıa­lyq forým. Uıymdastyrýshy azamattardyń aıtýynsha, bul forýmǵa qazaqtyń aldyńǵy qatarly oıshyldary, saıasat­kerleri, ekonomıseri, saıasattanýshylary, qaıratker­leri men patrıot azamattary jınalmaq eken. Kedendik odaqqa kirý qaýpinde turǵan Qyrǵyzstan men osy uıymǵa bizben birge kirgen Belorýssıa ókilderi de kelmek eken. Biz mundaı keleli, mańyzdy ári óte qajetti jıynǵa óz qoldaýymyzdy bildiremiz! Antıeýrazıalyq forýmǵa ózimizdiń qatysatynymyzdy málimdeı­miz jáne oǵan sizderdi de shaqyramyz! Bul jıynda qoǵam qaırat­kerleri óziniń bıik ıntellek­týal­dyq deńgeıin, bilgirligin kórsetedi dep senemiz. Eń bas­tysy, qazaqtyń basyna kıgizilgeli turǵan qamyttan qalaı qutylamyz degen saýaldyń jaýabyn birge tabamyz ba degen úmit zor. Ári qaraı ne isteımiz, táýelsizdikti saqtaý úshin qandaı qadamdarǵa baramyz degen másele tó­ńireginde de oılansaq eken, qurmetti aǵaıyn.

Qabdesh Jumadilov, Temirhan Medetbek, Sofy Smataev, Jasaral Qýanyshálın, Baqtıar Albanı, Ermurat Bapı, Jarylqap Qalybaı, Erbol Jumaǵulov, Marıanna Gýrına.

Uıymdastyrýshylardan: Antıeýrazıalyq forým 12 sáýir kúni saǵat 11:00-de Almaty qalasy, Qazjol qonaqúıiniń konferensıa zalynda (Gogol men Seıfýllın kósheleriniń qıylysy) bastalady.

ABAI.KZ