Tanymal saıasatker Jasaral Qýanysháli bul týraly óziniń Feısbýktegi paraqshasynda bylaı deıdi:
Kórshi el basshysynyń sońǵy saparǵa attanýyna oraı aldaǵy ýaqytta, álbette, túrli pikirler aıtylady, jazylady, jarıalanady. Qazirdiń ózinde aıtylyp, jazylyp, jarıalanyp jatyr. Sondaı-aq, bul oqıǵaǵa meniń de óz kózqarasym bar, alaıda ol ádette mundaı jaǵdaıǵa oraı týyndaıtyn saıası taldaý túrindegi qózqaras emes, ázirshe tek ózbek prezıdentiniń bu dúnıeden baz keshý SEBEBİNE baılanysty, menińshe, ózinen-ózi suranyp turǵan kózqaras bolmaq.
Aqparat kózderiniń habarlaýynsha, Islam Kárimov 26-tamyz kúni keshke ózbek sportshylarynyń osy qazir ǵana aıaqtalǵan Rıo Olımpıadasynan buryn-sońdy bolmaǵan tabyspen oralýyna baılanysty úlken toı (banket) jasap, sol toıdaǵy qýanysh ústinde óziniń ákimshiliginiń jetekshisi Zelımhan Haıdarovtyń saqtandyrǵanyna qulaq aspaı, araq-sharapty urttańqyrap qoıypty da, toıdan keıin bir jarym saǵat ótken soń sol Zelımhan akamen áńgime ústinde kenet esinen tana qulap, ınsýltke ushyrapty...
Al, biletinderdiń aıtýynsha, Karımovtiń Ózbekstan olımpıadalyq quramasynyń jetistigine júregi jaryla qýanatyndaı negizi bolǵan kórinedi. Ol negiz – bul kisiniń osy jetistikke tikeleı yqpal etkendigi bolsa kerek. Odan da góri naqtylaı aıtsaq, tórt jylda bir ret ótetin osynaý ulanǵaıyr álemdik jarys aldynda Islam aka Halyqaralyq áýesqoı boks asosıasıasynyń (AIBA) prezıdenti Chıng-Kýo Vý myrzamen óz kabınetinde jeke jolyǵyp, áńgime-dúken qurypty. Sonyń nátıjesinde, sheteldik aqparat kózderi habarlaǵandaı, Olımpıada barysynda sharshy alańda ózbek boksshylarynyń qatysýymen ótken birqatar aıqastarda tóreshiler olarǵa «oń kózimen» qarap, tipti jeńilis tapqan jaǵdaılardyń ózinde ózbekterdiń qolyn kóterdi. Ne jasyratyny bar, bylǵary qolǵan sheberleriniń kezdesýlerin bastan-aıaq tamashalaǵan osy joldar avtory da muny rastaı alady.
Máselen, alǵashqy kezdesýinen-aq barsha boks jankúıerlerin óziniń «meıýezershe» judyryqtasý sheberligimen tánti etken bizdiń Qaırat Eralıev 56 keli salmaqta baıyrǵy qarsylasy Mýrodjon Ahmadalıevten aıqyn basym tússe de, qazylar alqasy jeńisti ózbek boksshysyna berip, kópshiliktiń narazylyǵyn týdyrdy. Sondaı-aq, mundaı qaraýlyq 64 kelide Gerı Rassel men Fazlıddın Gaıbnazarov arasynda ótken básekede de oryn alyp, AQSH quramasynyń bas bapkeri Bıllı Ýolshtyń AIBA-ny «Ózbekstanǵa bolysýda» dep aıyptaýyna, al, aıqasty jiti qadaǵalap otyrǵan Floıd Meıýezerdiń tóreshiler sheshimin «ashyqtan-ashyq tonaýshylyq» dep baǵalaýyna sebepker boldy. Jalpy alǵanda, Ýolshtyń sol kezde-aq: «Ýzbekıstan tochno stanet lýchsheı komandoı v obshem zachete. Onı vyıgryvaıýt vse. Daje kogda vy pobejdaete na rınge, vam ne otdadýt pobedý», – dep, kóregendikpen jasaǵan jáne keıin shyndyqqa aınalǵan málimdemesimen óz basym tolyq kelisemin. Sóıtip, jarystan shyǵyp qalýǵa tıis bolǵan atalmysh eki ózbek boksshysy aqyrynda júldeli oryndarǵa iligip, biri qola, ekinshisi altyn medalǵa ıe boldy da, kerisinshe, jarysty jalǵastyrýǵa tolyq quqyqty bolǵan Qaırat Eralıev pen Oljas Sáttibaev (ázirbaıjan boksshysy Elvın Mamıshzadeden «jeńildi») tóreshilerdiń kópe-kórneý ádiletsizdigi kesirinen Olımpıadany erte aıaqtap, júldesiz qaldy. Áıtpegende, jartylaı fınalǵa Qazaqstannan tórt emes, kem degende alty boksshy, Ózbekstannan jeti emes, asyp ketkende bes boksshy shyǵatyn edi.
Sóıtip, bizdiń elderimiz Rıoǵa deıin táýelsiz memleketter retinde qatysqan bes Olımpıadada Qazaqstannan alty boksshy chempıon atanyp, Ózbekstannan mundaı ataqqa tek bir boksshy ǵana qol jetkizse, bul joly bizden tek Danıar Eleýsizov qana «qazaq salmaǵy» – 69 kelide ózbek boksshysy Shahram Gıasovty esh kúmánsiz jeńip, top jardy da, úsh birdeı (!) boksshysy chempıon atanǵan ózbekter aıdy aspannan bir-aq shyǵardy! Mundaı "ǵajaıyp" jaǵdaıdyń toqeteri belgili: tóreshiler «jasyl jaryq» jaǵyp qoıǵan boksyshylarynyń «arqasynda» tórt altyn medal alǵan (tórtinshisi – aýyr atletter úlesinde) Ózbekstan quramasy Rıodaǵy oıyndardyń sońǵy kúni tek boksshylar jarysynda ǵana emes, jalpy esepte de Olımpıadalar tarıhynda alǵash ret Qazaqstannyń aldyn orap ketti!
Árıne, bári adal bolǵan jaǵdaıda, sóz joq, biz qońsylas eldiń jetistigine ózbektermen birge qýanar edik. Alaıda, olaı bolmaǵan soń, shyndyqty aıtpasqa da amal joq. Jáne de, kim biledi, múmkin, Ózbekstan basshysynyń kenet qazaǵa ushyraýyna joǵaryda aıtylǵan jaǵdaılar da sebep bolǵan shyǵar?..
Deı turǵanmen, árıne, Islam Karımov qazasynyń arty qaıyrly bolǵaı dep tileımiz! Ózbekstan úshin, baýyrlas ózbek halqy úshin...
Sóz sońynda eskerte keteıin: Olımpıadada oryn alǵan keleńsiz jaǵdaılardy kólemdirek qamtý nıetimen bul maqalany men, kóńilimde esh sekem joq, osydan birneshe kún buryn jaza bastaǵanmyn. Alaıda, ózbek prezıdentiniń aldymen ınsýlt alýy, odan soń qaıtys bolýy jóninde oqys habar taraýyna baılanysty ol jumysty kidirte turyp, aqyr sońynda maqalany búgin qysqartyp jáne osylaısha ózgertip jazýǵa týra keldi...
