Elimizdegi eń shaǵyn mektep Soltústik Qazaqstan oblysyndaǵy Birlik aýylynda ashyldy. Munda nebári bes oqýshy bar. Bala sanynyń azdyǵynan úsh jyl boıy jabyq turǵan bilim ordasy bıyldan bastap qaıta jumys istep jatyr. Buǵan osy óńirge Qytaıdan qonys aýdarǵan qandastarymyz sebep bolǵan. Bul mektepte aınalasy bes shákirt úshin 10 adam jumys isteıdi, - dep habarlaıdy Qamshy.kz KTK arnasyna silteme jasap.
Aýdan ákiminiń qolynan mektepke kerek-jaraǵyn alyp jatqan Anar otbasymen bıyl kóktemde Qytaıdan kóship kelipti. Ótken oqý jylynyń tórtinshi toqsanyn aýdan ortalyǵynda támamdaǵan. Bıyldan bastap aýylda oqıtyn boldy.
Anar Ekpin, 3 synyp oqýshysy:
-Men Qytaıda jaqsy oqyǵanmyn. Endi bul jaqta jaqsy oqımyn degen úmittemin. Mektep ashylǵany da jaqsy boldy.
Birlik orta mektebi bala sanynyń azdyǵyna baılanysty 3 jyl buryn jabylǵan edi. Endi teriskeıge Qytaı men Taldyqorǵannan kóshken on otbasyndaǵy bes bala onyń qaıta ashylýyna sep bolyp otyr. Qonys aýdarǵandardyń keıbirine bilim oshaǵynan jumys ta tabylypty.
Álen Orazaly, Birlik aýylynyń turǵyny:
-Osy mektepke meni jumysqa ornalastyrǵaly jatyr. Jáne de pensıaǵa shyqqansha jasym elýge keldi, shamam jetkenshe osy Birlik aýylyndaǵy mektepte bir kisilik ese qosyp bersem degen maqsat.
Birlik mektebindegi bes balaǵa sabaq beretin eki muǵalimniń biri osy mekteptiń túlegi. Bir kezderi oqýshyǵa toly synyptar búginde eles bolyp qaldy deıdi ol.
Gúldana Ahmetova , muǵalim:
-11 jyldyq mektep bolatyn biz oqyp ketken kezde. Bunyń aldynda muǵalim men oqýshylar sany kóp edi. Qazir ekeý. Men jáne taǵy sol qazaq tili men ádebıetinen beretin muǵalim. Eki muǵalim.
Eń shaǵyn mektep ǵımaratyn jóndeýge úsh jarym mıllıon teńge jumsalǵan eken. Onyń syrtynda bir jarym mıllıonnyń qazandyǵy bar. Al eki muǵalim men bes balaǵa ot jaǵýshy, eden jýýshy, kúzetshi men meıirbıkeni qosqanda 8 adam qyzmet kórsetpek. Jergilikti bılik keler jyly bala sany kóbeıedi dep otyr. Óıtkeni ońtústikten osy aýylǵa taǵy on shaqty otbasy kóship keledi dep kútilýde.
