Óz elinde oryn alǵan qaqtyǵystar men zorlyq-zombylyqtar saldarynan mılıondaǵan bala bóten elge ketýge májbúr. Jat jurtta tabanynan tozyp júrgen búldirshinder sý men azyq-túlik tapshylyǵyn tartýda. IýNISEF Balalar qorynyń jańa baıandamasynda osy másele sóz bolady.

Qordyń atqarshýy dırektory Entonı Leık qazirgi adamzat qoǵamynyń basyna túsken sumdyqtardyń aıqyn nyshany retinde, Sırıadan Eýropaǵa barar jolda sýǵa batqan úsh jasar Alan Kýrdı men Aleppodaǵy qaqtyǵysta bomba túsken ǵımarattyń astynan shyǵarylǵan Omran Dagnıshty mysalǵa aldy.  

Álem boıynsha 50 mıllıon bala týǵan jerinen qol úzipti. Onyń 10 mıllıony bosqyn bolsa, mıllıonǵa jýyǵy baspana izdeýshiler, qalǵan 17 mıllıony ishki kóshi-qonǵa ushyraǵandar. Al 28 mıllıon sábı qaqtyǵystan qashyp, josyp ketken. Taǵdyrdyń tálkegine ushyraǵan sábılerge halyqaralyq qaýymdastyq kómektesýi kerek.

Álemdegi barlyq bosqyndardyń teń jartysyn balalar quraıdy. 2015 jyly bosqyn balalardyń 45 paıyzy Sırıa men Aýǵanstannan shyǵypty. Qajetti qujattary bolmaǵan soń panasyz balalardyń eresektermen birge tutqyndalyp jatqandary da az emes. Sondaı-aq baıandama avtorlary shet elge shyqqan balalardyń kóbisiniń qasynda ata-anasy joq ekenin aıtyp dabyl qaǵýda.   

2015 jyly ata-anasyz 100 myńnan astam sábı 78 memleketten baspana suraǵan. Bul 2014 jylmen salystyrǵanda úsh esege kóp. Shet elge aýǵan jasóspirimderdiń adam saýdasy qurbanyna aınalyp jatqandary da kezdesedi.

Entonı Leık halyqaralyq qaýymdastyqty balalardyń qaýipsiz ómir súrýine jáne durys bilim alýyna jaǵdaı jasaýǵa shaqyrdy. «Balalyq shaǵynan aırylǵan búldirshinder óz eliniń damýyna qandaı úles qosady?» dep túıindedi sózin, IýNISEF-tiń atqarýshy dırektory.

Sharafat Jylqybaeva