Búgin Halyqaralyq saýattylyq kúni. Osyǵan oraı BUU-nyń Bas hatshysy Pan Gı Mýn ádiletti qoǵam qurý maqsatynda memleketterdiń úkimetterin jeke sektormen birlese otyryp eresekter men balalardyń saýattylyǵyn kóterýge shaqyrdy.
Álem bıyl 2030 jylǵa deıingi Turaqty Damý baǵytyndaǵy aýqymdy isterdi júzege asyrýdy bastaǵanyn aıtqan Bas hatshy osy maqsatta basymdyq saýattylyqqa berilýi kerektigin eskertti. Saýattylyq adam quqyn qamtamasyz etýdiń, genderlik teńdiktiń jáne turaqty qoǵam qurýdyń irgetasy bolyp tabylady. Pan Gı Mýnnyń pikirinshe, saýattylyq shekti jaǵdaıdaǵy kedeılikti joıý úshin qajet. Adamzat ál-aýqatynyń ósýi úshin de saýattylyq qajet ekeni belgili.
Turaqty Damýdyń 17 maqsatynyń ishindegi tórtinshisi adam balasynyń sapaly bilim alýyn kózdeıdi. BUU-nyń Bas hatshysy sońǵy 50 jylda jetken jetistikterge qaramastan adamzattyń áli kúnge sapaly bilimmen qamtylmaı otyrǵandyǵyn aıtty. Bas hatshysy joldaýynda bilim alýdyń zamanaýı múmkindikterine tola qazirgi adamzat qoǵamynda 750 mıllıon eresek kisi saýatsyz ekeni aıtylǵan. Olardyń úshten ekisi áıel bolsa, 115 mıllıony – jastar. Bastaýysh mekteptegi 250 mıllıon bala árip tanymaıdy. Dúnıejúzi boıynsha 124 mıllıon bala men eresek jan mektep qabyrǵasyn kórmeıdi eken.
Bıyl 50-shi ret atalyp jatqan Halyqaralyq saýattylyq kúni «Ótken týraly oqyp, bolashaqty jazamyz» degen uranmen ótýde.
Búgin óziniń joldaýyn jarıalaǵan IýNESKO Bas dırektory Irına Bokova da saýattylyq barsha adam balasynyń baıandy bolashaǵynyń negizi ekendigin atap kórsetti.
Sharafat Jylqybaeva
