Búgin OKQ brıfıńi barysynda «Habar» AQ Baqsarma tóraıymy Almagúl Ahmetjanova  «Kazakh TV» men «Bilim jáne mádenıet» arnalary biriktiriletinin habarlady.

Iá, biriktiriletinindeı bar. Bul eki arnanyń aýdıtorıasy men óndiriletin kontenti bir-birine óte uqsas. Eki arna da tanymdyq baǵdarlamalar jasaıdy.

-Eki arna da tarıh, mádenıet, dástúr, bilim, týrızmge basa nazar aýdarady. Biz biriktirilgen arnada osy baǵyttardyń sapasyn odan ári arttyrýǵa múddelimiz. Biriktirilgen arna endi respýblıka aýmaǵynda qoljetimdi bolady. Ol 25 qazannan bastap «Kazakh TV» ataýymen efırge shyǵady», - dedi Almagúl Ahmetjanova.

Eki arna bolyp jumys istese de, biriktirilse de qazaq aýdıtorıasyna osy arnalar qajet pe edi?

«Kazakh TV» arnasy aldymen «CaspioNet» degen ataýmen 2002 jyldyń  25 qazanynan bastap kórermenge alǵashqy spýtnıkti arna bolyp jol tartqan.  Araǵa 10 jyl salyp, 2012 jyldyń 1 qyrkúıeginen bastap jańa «Kazakh TV» arnasy degen ataýmen taraı bastady.

Endi 2014 jyldyń qańtar aıynda QR Prezıdenti N.Á. Nazarbaevtyń tapsyrmasymen «Bilim» jáne «Mádenıet» arnalary biriktirilip, otandyq televızıa óndirisinde «Bilim jáne Mádenıet» mádenı-aǵartýshylyq baǵyttaǵy jańa telearna bolyp shyǵa bastapty.

Ataýy ózgertilgen alǵashqy arna men biriktirilgen keıingi arnanyń baǵyty bir – tanymdyq.

Endi osy jerde suraq týyndaıdy.

Bastapqy «Bilim» jáne «Mádenıet» telearnalaryn ashý nemese biriktirý nege, kimge kerek boldy? Endi sol birikken «Bilim jáne Mádenıet» telearnasy men «Kazakh TV»  arnasyn biriktirý arqyly kórermenge ne bere alamyz?

Ashylyp, artynan jabylyp, nemese bir birine qosylyp jatqan sany bar, sapasy joq arnalar kimge kerek?  Baǵyty qandaı? Aýdıtorıasy kimder?

Dál osy arnalardyń baǵytynda «Habar» arnasynyń ózi de jumys jasaıdy. Oǵan jaqynda ǵana ataýyn ózgertken «Habar 24» arnasyn qosyńyz.

Bir-birinen aıyrmashylyǵy joq arnalarǵa memleket búdjetinen qarjy bólý qanshalyqty tıimdi?

Aqshany arnalarǵa shashamyz dep, aıtary bir, aýdıtorıasy ortaq, mán-maǵynasy ketken qazaq televızıasyn jasap júrgen sıaqtymyz.

Jalpy búginde bir «Habar» agenttiginiń ózine  «Habar», «Habar-24», «Kazakh TV», «Bilim jáne mádenıet» sıaqty 4 arna kiredi.

Bir agenttiktiń jumysyn ustap turý úshin, ataýy ǵana basqa, óndiretin kontenti, aýdıtorıasy, baǵyty bir arnalardyń sanyn kóbeıtip ne kerek?

Qazir qalyń kórermennen «Kazakh TV» arnasy men «Bilim jáne mádenıet» telearnasynyń qandaı jobasy, qandaı jumysy esińizde qaldy, nesimen erekshelenedi dep surasańyz, kórermenniń ózi de esine túsire almaýy múmkin. Óıtkeni, kórermen jylt etken nárseni este saqtaı bermeıdi. Kórermenniń jadynda uzaq saqtalýy úshin qaıtalanbas teleónim bere alý kerek.

Qazirgi tańda «telearna aýdıtorıasy tek kózben kóredi» degen qate uǵymmen, kontenttiń maǵynasy men sózine asa mán bermeı jatamyz. Máselen, «jańalyqtardy júrgizýshi qyz qate oqysa da, ádemi bolyp otyrý kerek, kórermenniń kózin ádemilikpen ustaımyz» degen pikirdiń qalyptasqany qashan...

Sol sıaqty, kórermenge bereri joq arnalardy biriktirip, memlekettiń búdjetinen odan ári jumysyn jalǵastyra bergenshe, qarjy ekonomdaý úshin sany bar, sapasy joq arnalardy jaýyp tastaı salý kerek.

Sonda halyqqa qajetti ónimdi bere almasaq ta, halyqtyń qarjysyn jumsaýda paıda keltirer edik.

Indıra Qýat