Qazaqstan Respýblıkasynyń Premer-Mınıstri Baqytjan Saǵyntaev mınıstrlerge jyldyń sońyna deıin shet memleketterge is-saparǵa shyǵýdy toqtatý týraly tapsyrma qoıdy, - dep habarlaıdy Qamshy.kz QazAqparatqa silteme jasap.

«Prezıdenttiń bizge bergen tapsyrmasy anyq ári naqty. Onyń barlyǵy belgilengen merzimde jáne sapaly oryndalýy tıis. Sondyqtan bizdiń bárimizdi de qaýyrt jumys kútip tur. Elbasymen birge bolatyn saparlar bolmasa, búkil sheteldik saparlardy jyldyń sońyna deıin toqtata turý kerek. Asa bir qajettilik týyndaı qalsa, onda meniń jeke ókimim boıynsha shyǵasyzdar. Elimizdiń óńirlerine jumys saparlaryńyzdy da kelisim boıynsha jasaısyzdar», - dedi B. Saǵyntaev búgin alǵash ret Úkimet otyrysyn ótkizý barysynda.

«Sizderge Úkimet basshylyǵy tarapynan qandaı sheshimder kerek, tez arada anyqtap, usynystaryńyzdy engizińizder. Taǵyda bir másele, biz qabyldaǵan sheshimderdiń barlyǵy qarapaıym xalyqqa túsinikti ári jeńil bolýy tıis. Bizdiń kez kelgen sheshimderimiz jurtshylyqqa der ýaqytynda jetip, maqsat-mindetter men olardy sheshýdiń joldaryn únemi túsindirip otyrý kerek», - dedi ol.