Aqtóbedegi teraktiden soń týra úsh aı toǵyz kúnnen keıin oblystyq İshki İster departamenti sot aldyna keldi.  Tártip saqshylarynyń qateligi saldarynan "Terrorısterdiń" tizimine  kirip ketken aǵaıyndy Samat pen Tańat Qojanıazovtar osy ýaqyt ishinde bılikten birde-bir adam kelip keshirim suramady deıdi. Polısıany jaýapqa tartýdy kózdegen olar tipti moraldyq shyǵyn retinde 10 mıllon teńge talap etip otyr, - dep habarlaıdy Qamshy.kz 31-arnaǵa silteme jasap.

Sot zalyndaǵy aıyptalýshy otyratyn oryn búgin bos. Biraq bul jaýap berýshi tarap joq degendi bildirmeıdi. Bul joly sot aldynda bútindeı bir Aqtóbe oblystyq İshki İster departamenti. Quzyrly organnyń ústinen aryz jazǵan aǵaıyndy Samat pen Tańat Qojanıazovtar. 5 maýsymda Aqtóbede terakt jasap, áskerıler men beıbit turǵyndarǵa aıaýsyz oq jaýdyrǵan terrorısterdiń tizimine Qojanıazovtardy engizip jibergenderi úshin departament qyzmetkerleri kináli deıdi. Naqtyraǵy, Tańatty óltirilgen lańkesterdiń, al Samatty izdeý salǵan terrorısterdiń qataryna qosyp, jalǵan aqparat taratqandary úshin jaýap berip, tipti keshirim suraýlaryn talap etedi. 

TAŃAT QOJANIAZOV  Jaǵabulaq aýylynyń turǵyny:

  - Men 9-y kúni kórdim. 10-y kúni ashýmen keldim jeńgemdi ertip. Aǵam bara almady davlenıe bolyp, úıden shyqqysy kelmedi. Bir jeti kútińiz, bir jetiden keıin habar beremiz, keshirim suraımyz dedi. Bir aı ótti, eki aı ótti, úshinshi aıǵa ketti keshirim suraǵan joq.

Al, Aqtóbe oblystyq ishki ister departamenti aǵaıyndylardan keshirim suraýǵa asyqpaıdy.

QARLYǴASH QURMANǴAZINA, Aqtóbe oblystyq İİD ókili:

 - Kinámiz bolsa, suraımyz. Kinámiz bolmasa, suramaımyz. Qazir kinámiz joq. Nege deseńiz ol «sosıalnyı sette» aıtylǵan anyqtama. «Sosıalnyı setttiń» bizge eshqandaı qatysy joq.

 - Ol adamdardyń tizimin kim shyǵaryp otyr onda?

 -  Bilmeımin, bizdiń esh qatysymyz joq.

Búgingi alǵashqy sotqa aǵaıyndy Qojanıazovtar aýyldarynan kórshileri men týma-týystaryn erte kelipti. Olardyń bári  kýáger retinde tyńdaldy. Al Samattyń jary bul jaǵdaıdyń otbasyna aýyr soqqy bolyp tıgenin  aıtady.

GÚLMIZA QALBEKOVA, Samat Qojanıazovtyń jary:

 -  Stress boldy meniń joldasymda shyndyǵy kerek. Bir adam kelgen joq bizdiń aldymyzǵa. Áli bul spıskada júr degen soń biz máseleni qozǵap turmyz. Qaı jerge barsaq ta aldymyzdan shyqty.

Tegimizge qara kúıe bolyp jaǵylǵan bul jaǵdaı áli de kesirin tıgizýde deıdi azamattar. Tipti aýyldastary da eki jigitke ázildep «terrorıst, vahabıst» dep  laqap at qoıyp úlgeripti.

SAMAT QOJANIAZOV, Jaǵabulaq aýylynyń turǵyny:

- Shet el túgili Qazaqstanda, myna Beıneýde osy turǵanda orıentırovkada turmyn.

JANAR QOJANOVA, tilshi:

- Lańkesterdiń tiziminen alynsa da Qojanıazovtardyń tegi elimizdegi qylmyskerlerdiń jalpy bazasynda áli turǵan kórinedi.  Endi aǵaıyndy jigitter bul jaǵdaı  ósip kele jatqan balalarymyzǵa keri áserin tıgizedi me dep qorqady. Sol úshin de óz tekterin aqtap alǵylary keledi. Sottyń kelesi otyrysy qyrkúıektiń 26-  na belgilendi.