Májilis depýtatynyń aıtýynsha, ekinshi deńgeıli bankter nesıe tóleýshilerge qatysty qıturqylyqtarǵa baryp otyr, - dep habarlaıdy Qamshy.kz.

Májilistegi «Aq jol» fraksıasynyń múshesi Merýert Qazbekova  osymen birneshe ret Ulttyq Banktyń tóraǵasyna saýal  joldady. Saýaldyń mánisi mynaǵan saıady: Úkimet dollardyń qymbattaýyna baılanysty onymen alǵan kredıtteri sharyqtap ketpeý úshin nesıe alýshylardyń qaryzyn «qaıta esepteý» (refınansırovanıe) maqsatymen 130 mlrd. teńge qarajat bólgen edi. Osyny ekinshi deńgeıdegi bankter ádiletsiz paıdalanyp jatqan kórinedi. Atap aıtqanda 3 aıdan artyq qaryzy barlardyń tólemderine olar 1 dollardyń 180 teńgelik burynǵy kýrsyn, al qaryzyn úzbeı tólep kele jatqandarǵa kelgende 1 dollardyń 350 teńgelik búgingi kýrsyn qoldanatyn kórinedi. Demek, teńgege aınaldyrǵanda 1000 dollarlyq qaryzy bolyp, onyń qaryzdaryn  3 aıdan artyq tólemegenderdiń moınyna 180 myń teńge ilinse, úzbeı tólep kele jatqandardyń 1000 dollarlyq qaryzy 350 myń teńgege kóbeıipti. Al úkimet bólgen joǵaryda aıtylǵan qarajat osy kýrstarmen anyqtalǵan qaryz somalaryn azaıtýǵa jumsalady.

«Mássaǵan bezgeldek» degen osyndaıda aıtylatyn shyǵar. Árıne, bul bankterdiń quıtyrqy áreketi. Óıtkeni, burynnan qaryz bolyp kele jatqandar tóleı qoımas dep olarǵa 180 teńgelik kýrsty qoldanǵan, al úzbeı tóleıtinder eshqaıda qashpaıdy, muny da tólesin dep 350 teńgelik kýrsty qoldanady eken. Sóıtip, kónbisterge kelgende «buǵa bergenge suǵa bergen» bolypty. Depýtat osyny ádiletsiz kórip, barlyq qaryzgerlerge de 180 teńgelik kýrsty qoldaný kerek deıdi. Ulttyq bank sony eskerse ıgi...

Q. Atambaev

ekspert