Búginde qultemirler (robot) sany jóninen álemde aldyńǵy orynda turǵan Japonıada adam tárizdi is-qımyl jasaıtyn robottyń kóptegen túrleri tanymal. Endi solardyń birnesheýine toqtalaıyq.
Saıa esimdi hatshy robot
Tokıodaǵy Jaratylystaný ǵylymdary ýnıversıtetinde Saıa esimdi hatshy jumys isteıdi. Biraq ol adam emes, hatshy qyz beınesinde jasalǵan robot. Ýnıversıtettiń tehnologıa fakúltetiniń ǵylymı-zertteý laboratorıasyna kelýshilerdi qabyldap, tirkep, aqparat jınaýmen aınalysatyn hatshy robot sóıleıdi, kúledi, tipti renishin de jasyrmaıdy. Ol qabyldaý bólmesine kelgen adamǵa basyn ızep, sálem beredi de, “bul neǵylǵan jan?” degendeı jaqsylap qaraıdy. Sodan soń kisiniń qandaı sharýamen kelgendigin suraıdy. Kelýshini tirkegen soń, mekemege kirýge ruqsat beredi eken. Ári aqyldy, ári eńbekqor, jalaqy talap etpeıtin Saıa sıaqty hatshy robot qaı mekemege bolsa da qajet-aý.
Hırýrg-robottyń qyzmeti orasan
Japonıada kisi hırýrgtyń áli qoly jete qoımaǵan múmkindikterin hırýrg robot tolyqtyrýda. MM1 júıesi boıynsha iske qosylǵan ǵajaıyp robot mıdaǵy aqaýlyqty jyldam taýyp, usaq-tamyrlarǵa em jasaıdy eken. Eger dáriger monıtorǵa qarap otyryp, qural-saımandar arqyly 100 mm mólsherdegi tamyrlarǵa qozǵaý salsa, hırýrg robot 5mm-lik óte usaq kólemdegini kóre alady eken. Sondaı-aq, onyń tereńdigi 60 mm, eni 0,8 mm óte jińishke qan tamyryna operasıa jasaý múmkindigi bar. Hırýrg - robot Tokıo ýnıversıtetiniń tehnıkalyq zertteýler ınstıtýtynda jasalyp, ýnıversıtettiń medısına fakúltetine qarasty aýrýhananyń mı jáne júıke júıesin emdeıtin bólimshesinde iske qosylǵan.
Ottan, sýdan, urydan... bárinen qorǵaıtyn kúzetshi robot
Japonıadaǵy «Gadrobo-D1» dep atalatyn patrúl saqshysy kez-kelgen mekeme, zaýyt-fabrıka, qoımalardy qaraýyldaı alady eken. Onyń keýdesine, arqasyna jáne qos búıirine tórt beınekamera ornatylǵan. Robot óziniń kamerasy túsirip alǵan beınelerdi avtomatty túrde «Qaýipsizdik ortalyǵyndaǵy» mamandarǵa jiberedi. Ol sonymen qatar kúdikti kisini baıqasa nemese órt pen sý shaıý qaýpin sezse dereý dabyl qaǵady. Kúzetshi robottyń taǵy bir keremeti — kenetten órt shyǵa qalsa órt sóndirgish quralymen birden sóndire qoıady. Ámbebap kúzetshiniń dene turqy 110 santımetr, salmaǵy 80 kılogramm. Bul robotty Kúnshyǵys elindegi «Kúzet qyzmeti» dep atalatyn aksıonerlik kompanıa paıdalanýda.
Sharafat Jylqybaeva
