«ALÚMINI HANYMY» ATANǴAN  GÚLJAN

 «Qazaqta baıtal shaýyp, báıge almas» degen maqal bar. Bul maqaldyń kimge qarata aıtylǵany túsinikti, desek te, aıdaı álemdi aýzyna qaratqan  qazaqtan shyqqan isker áıel Gúljan Moldajanovaǵa munyń esh qatysy joq sekildi. Onyń mansaby búginde qazaq qyzdarynyń aýzynyń sýy quryp aıtatyn áńgimesine aınaldy. Shynynda da, kez kelgen bastyqtyń qabyldaý bólmesinde syzylyp otyratyn hatshy qyzǵa qarap, «keıin osy qyz álem moıyndaǵan isker áıel bolar-aý» nemese «Ataǵy dardaı osy holdıńtiń tizgini bir kúni myna qyzdyń qolyna tıer-aý» dep oılaýymyz neǵaıbyl. Al solaı bolsa she?   Durysy solaı boldy.  Gúljannyń taǵdyry «Zolýshkanyń» taǵdyry tektes. Taýyspaǵan oqýy joq. İzdendi. Sóıtip, bilim baspaldaqtarynan bastalǵan onyń qadamy keıin  bıznes baspaldaqtaryna ońaı ilikti...

Amerıkanyń Fortune atty isker jýrnaly jarıalaǵan álemniń eń yqpaldy da isker elý áıeliniń tiziminiń alǵashqy ondyǵynan oıyp turyp oryn alǵan qazaq qyzy Gúljan Moldajanova  kezinde reseılik «Bazovyı element» holdıńiniń bas dırektory bolǵan. Ol basshylyq etken ýaqytta kompanıanyń tabysy eselep artqan.

            Fortune sarapshylary Gúljan Moldajanovany osyndaı tizimge birneshe dúrkin  kirgizgen bolatyn. 2006 jyly 22-shi orynda tursa, 2007 jyly 20-shy orynǵa kóterilgen. Al jaqynda eń yqpaldy Forbes jýrnaly jarıalaǵan 100 eń yqpaldy áıel tiziminde Gúljan Moldajanova 37-shi orynǵa ıe boldy. «Alúmını hanymy» atanǵan Gúljan Moldajanova keıin Oleg Derıpaskaǵa ornyn bosatty.  Bul týraly «Kommersant» gazeti: «Moldajanova hanym basqarǵan úsh jyldyń ishinde «Bazel» jyldam ósti. 2007 jyldyń qorytyndysy boıynsha, olardyń ózderi bergen málimetterge sáıkes, holdıń aktıvteriniń quny eki esege ósip, $45 mlrd-qa jetken. Túsim kólemi 45%-ǵa deıin ósip, $ 26,8 mlrd. bolǵan. 2008 jyldyń maýsym aıynda Moldajanova hanym 2009 jyldyń aqpan aıynda bitetin eńbek shartyn taǵy bes jylǵa sozýǵa Oleg Derıpaskadan usynys alǵanyn aıtqan edi» dep jazdy.Bul qyzmetten keıin ESN tobyna qyzmetke kirip, ol jerde de bas dırektor bolyp, tizgindi óz qolyna alady. İsker qyz óz isinen jańylmaıdy. Barǵan jerin jandandyryp, isi ońǵa basa bastaıdy dereý. Aıtpaqshy, ol qazir bizdiń «Samuryq-Qazyna» ulttyq ál-aýqat qory Dırektorlar keńesiniń múshesi de.

Hatshydan Bas dırektorǵa deıin:

1966 jyly Almaty qalasynda dúnıege kelgen Gúljan  1989 jyly KazGÝ-diń fızıka fakúltetin bitirgen.  Al  1998 jyly  Úkimet janyndaǵy qarjy akademıasyn támamdaǵan.   Bara-bara shetelge shyǵyp, sol jaqtaǵy oqý oryndaryn taýysa bastady...

 1994-1995 jyldary Máskeý memlekettik ýnıversıtetinde ǵylymmen aınalysqan. Keıin 1995 jyly Oleg Derıpaskanyń  holdıńine kelip, «Rosalúmınprodýkt»-tiń bas dırektorynyń hatshysy bolyp qyzmetke turady. Sol kezdegi onyń jalaqysy bar bolǵany  200 AQSH dollary edi. «Men bul jumysyma  «tamaq satyp alýǵa jetetin aqsha beretin qyzmet» dep qaraýshy em» dep eske alypty bir suhbatynda.  Kóp uzamaı qyzmette  aıy ońynan týyp turǵan Gúljan qarjy dırektorynyń kómekshisi bolyp shyǵa keledi. Sóıtip, «Sibir alúmınıi» komersıalyq dırektory oryntaǵyna jaıǵasty.  

Birazdan soń  «Bazel»-diń  bas dırektory bolyp bir-aq qonjıǵan  Gúljan «Alúmını hanymy» atanyp, aıdaı álemdi aýzyna qaratty.

Dınara İztileý