Qumsaı aýylynda turatyn Boqanovtar otbasy 25-tegi ulyn dármensizdikten baılap ustaýǵa májbúr,- dep habarlaıdy Qamshy.kz KTK arnasyna silteme jasap.
Zińgitteı jigit talmasy ustaǵan sátte eshkimge ál bermeı ketedi. Jaqynda tipti ákesiniń saýsaǵyn shaınap tastaǵan.
Nunbaı Boqanov, A.Boqanovtyń ákesi:
-Anda-sanda «kóteriledi». Sol kóterilgen kezde kóshege shyǵyp bireýge zıany tıip kete me degen oı boldy . Aıaq-qoly baılaýly turady. Sonda da sol saýsaǵymdy tistep aldy.
Azamatty ata-anasy bir sátte kózden tasa qylǵan emes. Ózi de aýladan árige shyqpaı, kúndiz jaqyndaryna qolǵabys berip júredi. Tek túnde bul shańyraqtyń tynyshtyǵy qashady. Azamat kóterilgende ne istep, ne qoıǵanyn bilmeıdi.
Azamat Boqanov:
-Kúndiz deni saý adam qusap júremin. Áke-sheshemniń qasynda jatamyn quttaı bala sıaqty. Bylaı-bylaı shyǵa da almaısyń. Sharshadym.Túsinbeımin. Emdelgim keledi...
Bul dert jigitke áskerde tap bolǵan. Aýyr soqqy alǵan kúni alǵash esinen tanady. Úsharaldaǵy bólim basshylary tóbeles bolǵanyn jasyryp, ony epelepsıamen aýyrǵan dep eline shyǵaryp salǵan kórinedi.
Azamat Boqanov:
-Beseýi jabyldy. Tóbeles qalaı aıaqtalǵanyn ózim de bilmeı qaldym. Tańerteń kazarma ishinde jatyrmyn. Tula boıym, aıaq-qolym tartylyp.
Otan qorǵaımyn dep baryp, aýrý jamap qaıtqan ulynyń bolashaǵyna ata-anasy alańdaıdy. Kóterilgende alasuratyn onymen arpalysyp ózderi de sharshaǵan. Osy kúnge deıin kórsetken mamandardyń eshbiri naqty dıagnozdy qoıa almady. Tipti jyndyhanaǵa jatqyzǵan. Ondaǵylar saý dep shyǵaryp salypty.
Zylıha Smaǵulova, A.Boqanovtyń anasy:
-Jylap-eńirep ákesi ekeýmiz barmaǵan jerimiz joq. Reseıge deıin bardyq osyǵan bir shıpa izdep. Biz balamyzdy armıaǵa aýrý bop qaıtsyn dep jibermegen edik....
Bul otbasy emshi dese eleńdep, uldarynyń dertin anyqtaıtyn maman izdep otyr. Aımaqtaǵy densaýlyq saqtaý basqarmasyndaǵylar em-domymen aınalysamyz dep ýáde etti. Dese de, osyndaı jaǵdaıǵa tap qylǵan áskerılerdiń áreketi kesh bolsa da jaýapsyz qalmasa dep tileıdi ata-anasy.
