Búgingi tańda Baıqońyr qalasynda salyq salý máselesine qatysty taýar baǵasy jasandy túrde ósirilip otyr. Bul jaǵdaıdy sheshý úshin «1995 jylǵy 23 jeltoqsandaǵy QR men RF arasyndaǵy Baıqońyr qalasynyń mártebesi jáne ondaǵy atqarýshy ókimet organdaryn qurýdyń tártibi men olardyń mártebesi týraly kelisimge ózgerister engizý týraly hattamany ratıfıkasıalaý týraly» zań jobasy ázirlengen. Qujatty búgin Májilis depýtattary maquldady, dep habarlaıdy Qamshy.kz Baq.kz saıtyna silteme jasap.
«Osy hattamanyń eń basty maqsaty janama salyqtar men qosarlanǵan salyq salý máselelerin retteý bolyp tabylady. Búgingi tańda Baıqońyr qalasynyń aýmaǵyna satylatyn taýardyń baǵasyna bizdiń kásipkerler qosylǵan qun salyǵyn qosady. Al Baıqońyrdaǵy reseılik salyq tóleýshiler ol qosylǵan qun salyǵyn esepke almaıdy, ıaǵnı sol salyqtyń somasynan taýardyń baǵasy kóteriledi. Oǵan qosa sol taýardyń qunyna Reseı federasıasynyń zańdaryna sáıkes 18 paıyz mólsherinde qosylǵan qun salyǵy esepteledi», - deıdi QR Qarjy mınıstri Baqyt Sultanov.
Onyń aıtýynsha, dál osyndaı jaǵdaı Baıqońyrdan Qazaqstannyń basqa aýmaqtaryna taýar satqan kezde de bolady. Osylaısha, baǵa jasandy túrde ósedi.
«Bul jaǵdaıdy sheshý úshin biz reseılik áriptesterimizben birigip osy hattamanyń jobasyn ázirledik. Biz qazirgi kezde Eýrazıalyq ekonomıkalyq odaqta jumys istep turǵan mehanızmdi hattamada qoldandyq. Qazaqstannyń basqa aýmaǵynan Baıqońyr qalasyna taýar satý kezinde qosylǵan qun salyǵy «nóldik» mólshermen esepteletin bolady jáne qosylǵan qun salyǵy Baıqońyrda bir ret 18 paıyzben óndirip alynady. Osyndaı prınsıp Baıqońyr qalasynan Qazaqstannyń basqa aýmaǵyna taýar satylǵanda da qoldanylatyn bolady», - dedi mınıstr.
B.Sultanov atap ótkendeı, jumystardy oryndaý men qyzmetterdi kórsetý kezinde salynatyn qosylǵan qun salyǵy boıynsha da osyndaı tásil paıdalanylady.
