Ertede qazaqta Qorqyt degen aýzy dýaly bir qart ótipti, sol kisimen zamandas Bóri degen ári baı, ári bı ótken eken. Sol bı bala kórmeı júrip, bir jyly uldy bolady. Buǵan jaryla qýanǵan Bóri bı yrym ǵyp balasynyń atyn Qorqgg ataǵa qoıǵyzady, sońdaǵy Qorqyt atanyń batasy mynaý eken:

Sózimdi tyńda Bóri baı,

Táńiri saǵan ul berdi.

Jastaıynan baq qonyp,

Uzyn bolsyn ómiri,

Basa bersin ilgeri,

Qolynan týy túspesin!

Talyqpasyn bilegi!

El qorǵaıtyn er bolsyn,

Musylmannyń tiregi.

Aspaq bolyp barsa qarly taý,

Bógemeı asý bersin!

Ótpek bolsa qandy ózen,

Bógemeı keshý bersin!

Uran sap jaýǵa shapqanda,

Jolyn táńiri ondasyn!

Jaratqan ıem Bamysqa

Jar bolyp ózi qoldasyn!

Batyrdyń qaırat kúshine

Esh kóldeneń bolmasyn!

Balanyń aty Baıshubar –

Aty Bamys Baıraq bolsyn,

Atyn men qoıdym,

Jasyn Alla bersin!

Bamys Baıraq arystandaı azamat bolyp, jaýyn jeńip oralǵanda Qorqyt Ata taǵy da bylaı bata bergen eken:

* * *

Qara taýyń qulamasyn,

Báıteregiń jyǵylmasyn.

Aqsaqaldy babańnyń

Topyraǵy torqa bolsyn.

Aqjaýlyqty anańnyń

Jatqan jeri jánnat bolsyn.

Ulyń menen baýyryńnan Qudaı aıyrmasyn,

Aqyrǵy kúnińe ımanyń joldas bolsyn.

Áýmın degender Táńirdiń júzin kórsin.

Aty ardaqty Muhammedtiń qurmeti úshin,

Qúnálaryndy Qudaı keshirsin!

* * *

Qara taýǵa jolyqsań asý bersin.

Qańdy sýǵa jolyqsań keshý bersin.

Erlik istep baýyryńnyń kegin aldyń,

Qudiretti Oǵyz bekterin aýyr júkten qutqardyń,

Jaratqan Alla júzindi aq qylsyn.

Ólim ýaqyty kelgende ımannan aıyrmasyn,

Kúnámizdi Aty ardaqty Muhammed

Mustafanyń qurmetine Qudaı keshirsin!

* * *

Elshi erdiń tórt qubylasy teń bolsyn!

Elde-kisi, syrtta bútin el bolsyn!

Nany-tuzy, isher asqa baı bolsyn,

Kıim-keshek, bes qarýy saı bolsyn.

Ásker basy talaı isti meńgersin,

Jaýǵa shapsa, sol bilgeni dem bersin.

Bek bilimdi aqyldy, adal bolsyn, aq bolsyn,

Parasaty, aqyly izgilerge jaq bolsyn!

Bek beseýden boıyn aýlaq qylsyn,

Bilsin sonda, basynan qus ushpasyn.

Jaqsylardyń isin Qudaı ońdasyn,

Qut darytyp, yryzdyq berip qoldasyn.

Bilip sóıle, sózińde sól, óń bolsyn,

Sóziń túpsiz qarańǵyǵa kóz bolsyn!

Taýyp sóıle sóziń ońdy, jón bolsyn,

Sóziń, basyr adamdarǵa kóz bolsyn!

El saılady – qylyq, isiń saı bolsyn!

Kóńil, dil, is, sóz shyndyǵy-syı bolsyn.

Sodan halqy bilsin bektiń baǵasyn,

Begi ıgi bop, ataq dańqy tarasyn.

Tirligińde izgilik kóp bolsyn,

Enshisin al, qur ótken kún joq bolsyn!

Kóp sóıleme, sóziń sý bop ketpesin,

Jurt zerigip, sózden japa shekpesin!

Bosqa qarap ár nársege telmirip,

Qur qalyp, ǵarip bop ómir ótip ketpesin!

Bolat Bopaıuly Jota Qajy