Oshaǵan – gúldiń aty, dala gúline jatady.

Qazaq bul gúldi «oshaǵan gúl», «kárqyz» dep eki túrli atpen ataıdy. Qazaq gúl tanýshylary oshaǵandy kúrdeli gúlder tuqymdasyna jatqyzady. Birjyldyq shóptesin ósimdik dep qaraıdy. Japyraǵy bútin jıekti ne ara tisti, bir úıli, kezektesip ornalasady. Atalyǵynda 5 analyq gúl sebetteri bolady. Tuqymy uzynsha, eki búıiri qysyńqy, qos tuqymdy, jańǵaqsha. Tyń sabaqty, kóp butaqty, tikendi keledi.  Jer júzinde 25 túri bar. Eń kóp, eń kólemdi taraǵan, dańsaly ósimdikter sanatyna kiredi. Tamyz, qyrkúıek aılarynda gúldeıdi. Tuqymy sur jasyl tústi bolady. Oshaǵan quramynda ıod kóp. Sondyqtan «dári shóp», «dári gúl», «em gúl» dep ataǵan.

Oshaǵannyń taǵy bir túri – onyń boı bıiktigi 1-2 metr shamasynda bolady. Tamyry jýan, tumar tárizdi keledi. Onyń kóp shashaq tamyrlary bolady. Sabaǵy tyń ósedi. Joǵarǵy jaǵynan butaqshalary ósip shyǵady. Túp jaǵyndaǵy japyraǵy toptasyp ósedi, japyraǵy óte úlken keledi. sopaqsha jumyrtqa formaly. Bári de shashaqty keledi. Shoqtas gúli basynda ósedi, qyzyl kúreń tústi. Syrtqy basy gúl, ortanshysy shar tárizdes bolady. gúl oranshysynyń ush jaǵy ilmek, ıne tárizdi. Tuqymsha jemisi sopaqtaý, tóńkerilgen jumyrtqa formaly, surǵylt tústi. Egis atyzdarynda, jol jaǵalarynda, aryq broılarynda, jazyq shópti jerlerde, qonys mańynda kóp ósedi. Oshaǵannyń  tamyry, japyraǵy, sabaǵy, jemisi, tuqymy dári bolady. kúz maýsymynda tamyryn qazyp alyp, kúnge keptiredi, jumsartyp týraıdy, jazda japyraǵyn jastaı ne keptirip paıdalandy, dárilik qorǵa saqtaıdy.

Oshaǵannan jasalǵan dárilerdiń qasıeti – ashshy ári kermek, sýyq raıly, ýytsyz keledi. Ókpeni tazalaıdy, qyzylshany syrtqa shyǵarady. Jutqynshaq qabynýyn emdeıdi, ýytty qaıtarady. Tumaý, jótel, kómekeı, jutqynshaq isip aýyrǵanda, qyzylsha shyǵa bastaǵanda, qart adamdardyń taramysy tartylyp, súıegi syrqyrap aýyrǵanda, bet-aýyzdyń isýine, omyraý beziniń qabynýyna, qalqansha beziniń isigine em bolady. Qazaqtyń ádebı til ónerinde: «Oshaǵandaı jabysyp aldy», «káriqyzdyń tikenindeı» degen sóz tirkesteri bar.

«Esik aldy oshaǵan,

Ustatpaıdy qashaǵan.

Qaıta aınalyp kelgenshe,

Aman bolsyn bosaǵam», (syńsý)- degen óleń joldary bar.

         En dalada erkin kóship, tańdaǵan qutty qonysyna qonǵan qazaq halqynyń esik aldynda, irgesinde oshaǵan gúli ósip-ónip turatyny anyq.

Bolat Bopaıuly Jota Qajy