Internette Rızabek Battalulynyń qyzdardyń oramal taǵý máselesi týraly bılikke qarata aıtylǵan syn-eskertpesi jarıalandy, dep habarlaıdy "Qamshy" portaly. Onda ol, Oramal taǵý máselesi týraly bılikti musylmandarmen mámelege kelýge shaqyrady.

Rızabek Battaluly — «Ál-Azhar» ýnıversıtetiniń «hadıs» bóliminiń túlegi. Rızabek ustaz Sheıh Hazım Kaılanı, Sheıh Hamdalla, Sheıh Djamal Farýh, Sheıh Mýstafa Kınaýı sıaqty hanafı sheıhtarynan jáne basqa da aty tanymal ári syıly ǵalymdardan sabaq alǵan.

Aıta keter bolsaq, Qazannyń 19-y kúni Qazaqstannyń úsh birdeı mınıstrligi: bilim jáne ǵylym, ádilet, din jáne azamattyq qoǵam mınıstrlikteri Qazaqstan zańnamasyna sáıkes dinı baǵyttaǵy kıimderdi mektepke kıýge tyıym salynǵanyn málimdedi.

Buǵan baılanysty: "Dinı ereksheligi bar kıim, oramal, hıdjab jáne t.b. kıýge jol berilmeıdi jáne buǵan deıin de tyıym salynǵan. Zańnamanyń normalary barlyq ultqa ortaq. Dinı kıimdi tek bilim mekemesinde kıýge bolmaıdy. Onyń syrtynan tys jerde ne kıse de óz erki. Olardyń dinı kózqarasyna shekteý joq. Eshkim de balanyń kıimin kúshtep sheshe almaıdy. Ázirge «balamdy mektepke kirgizbedi» degen shaǵym túsken joq. Biz oqýshy quqyǵyn buzbaımyz. Biraq olardyń da erejeni buzýyna jol bermeımiz", - degen edi bilim jáne ǵylym vıse-mınıstri Elmıra Sýhanberdıeva.

Al, Qazannyń 24-i kúni Qazaqstan musylmandary dinı basqarmasy (QMDB) oqýshy qyzdardyń mektepke oramal (hıdjap) taǵyp barýyna baılanysty "musylman jamaǵaty men ata-analardy oqý oryndary basshylarymen ortaq mámilege kelýge" shaqyrǵan bolatyn.

QMDB ıslamda sharıǵat talaby boıynsha ata-anasy kámelettik jasqa tolmaǵan qyzyna oramal taqqyzyp, jalpyǵa ortaq bilim alýyna tyıym salmaýy tıis ekenin aıtady. Málimdemede «ata-analar Qazaqstandaǵy bilim berý júıesi oqytýdy ǵana emes, adamdy ónerge, sportqa, zıatkerlik damytýǵa baǵyttalǵanyn sezinýi kerek" dep jazylǵan.

Sondaı-aq, Dinı basqarmasynyń oramalǵa qatysty 2013 jyly shyǵarǵan pátýasy da bar.