Ońtústik Qazaqstan oblysynyń sharýalary elimiz egemendik alǵan shırek ǵasyrda dándi daqyl jınaý boıynsha úzdik kórsetkishke qol jetkizip, rekord ornatty, dep habarlaıdy Baq.kz.

Oblystyq aýyl sharýashylyǵy basqarmasy mamandarynyń málimetinshe, bıyl óńir dıqandary 676 myń tonna (ótken jylmen salystyrǵanda 95 myń tonnaǵa kóp) ónim jınap, buryn-sońdy bolmaǵan nátıjeni berip otyr. Muny ortasha túsimdilikke shaqsańyz, gektaryna 26 sentner dándi daqyldan keledi eken. Sonymen qatar, bıylǵy maýsym sharýalardyń ózge de ónimderdi kóptep ósirip, jınaýda oń jambasynan kelipti. Máselen, osy maýsymda jınalǵan kókónis kólemi 109 myń tn. artyp, 963 myń tn. bolsa, baqsha ónimderi 30 myń tn. artyp, 1 mln. 413 myń tn, kartop 22 myń tn. artyp, 277 myń tn, jemis-jıdek 64 myń tn. artyp, 126 myń tn, júzim 22 myń tn. artyp, 63 myń tonnany kórsetti.

Munan bólek, sońǵy úsh jylda jerdi jańa ádispen ıgerý jumystary júrgizilýde. Osy jyly tereń qopsytý tehnologıasy 86 myń ga engizildi. Buǵan deıin tájirıbe júzinde maqtadan ortasha eseppen 26–27 s/ga. ónim alynsa, tereń qopsytý tehnologıasyn engizgen sharýashylyqtardan 40–45 sn/ga. ónim alynýda. Atalǵan tehnologıanyń katty topyraq ylǵaldylyǵyn saqtaýdaǵy tıimdiligin eskere otyryp, bul tehnologıany basqa da daqyldar men tálimi jerlerge qoldaný usynylýda.

OQO ákimdigi baspasóz qyzmetiniń málimetinshe, bıyl egin sharýashylyǵy boıynsha aýyl sharýashylyǵy daqyldarynyń kólemi ótken jylmen salystyrǵanda 12,8 myń ga. artyp, 788,6 myń ga boldy.

Ortasha eseppen respýblıka boıynsha óndirilgen maqtanyń - 100 %, júzimniń - 65 %, baqshanyń - 66 %, maqsarynyń - 40 %, jemis-jıdektiń - 31 %, kókónistiń - 24 % oblystyń enshisinde.

Bul aldaǵy ýaqytta Ońtústik Qazaqstan oblysyn respýblıka halqyn jergilikti azyq-túlik ónimderimen qamtamasyz etetin negizgi ortalyqqa aınaldyrý áleýetiniń joǵary ekendiginiń birden-bir aıǵaǵy.