Qudaǵı tabaq – qazaqtyń qudaǵı kútý jolynda, dastarhan jaıý saltynda da úlken jol bar, tártipti mán maǵyna bar. Eri qaıtys bolǵan, quda joq, qudaǵı ǵana kelgende, «qudanyń joly», «óli-tiriniń sybaǵasy» dep bas, jambas, omyrtqa, arqa, beldeme, qazy-qarta, jal-jaıa, qaryn, qımaı, ortan jilik, jaýyryn, quıryq-baýyr salynǵan úlken syı tabaq tartady. Muny qazaq kádesinde «qudaǵı tabaq» dep ataıdy.

Al, eri tiri áıelderge ádette bas tartpaıdy. «Bas tartsa, baıy óledi» dep yrymdaıdy. Ákesi tiri balalar da bas mujymaıdy, jemeıdi, basty qolyna da almaıdy. «Ákem tiri, bas mujymaımyn» dep jatady.

Qudaǵıdyń joly qyzynan da jińishke dep, ár iske jaýapty bolyp, ár qımylyn qalt jibermeı baǵady. Olaı bolsa, qudaǵı úlken aýyr min taǵady dep sanaıdy. «Qudaǵı kútý patsha kútýden de qıyn» degen támsil sózdiń astarynda alaqyzǵan alańdaý jatyr, jumysqa muqıattyq jatyr. Ary qaraı aıtsaq, tereń qoparyp qazsaq, jasyrmaı jazsaq, qudaǵıdyń tabasy jatyr. Sondaı syn aýadan týǵan tabalaýǵa emes, baǵalaýǵa usynǵan úmit pen kúdik jatyr... Osynyń bárin baǵaly kóńilden tanıtyn, jaqsylyqqa jarasqan, jaǵymdy qudaǵılary da qudalaryn bet aldy synamaıdy, joqtan ózgege jol tap dep qınamaıdy, qaıta shyn júrekten, aq tilekpen syılaıdy. Jaqsylyqpen jarysady, bir-birin aıalap, qarasady, oınap-kúlip, ata dastarqanynan dám tatyp tarasady.

Bolat Bopaıuly Jota Qajy