Memleketter - ártúrli aıdyndar men sýlarda júzip bara jatqan keme, qaıyqtarǵa uqsaıdy. Biri, muxıt tolqyndaryn qaq jarǵan alyp keme sekildi. Keýdesin kere shalqyp, keń dúnıege dabysyn jetkizip, degenin ótkizip otyrady. Jolyna kese-kóldeneń turýǵa bolmaıdy, qaqyratyp óte shyǵady. Barlyq júıesi avtomattandyrylǵan, qaı maýsymda, qaıda ketip bara jatqanyńdy baıqamaısyń da. İshki jaǵdaıdyń jaılylyǵynan saparda ekenińdi umytyp, ózińdi qaýipsiz meken, múlgigen tynyshtyqta júrgendeı sezinesiń. Kemeniń alyptyǵy men júıeniń beriktigi sondaı, keme kapıtanynyń bar-joǵyn, bilikti-biliksizin, aýysqan-aýyspaǵanyn da baıqamaısyń. Tipten, túbi tesilip sý kirip jatsa da, taýdaı muzǵa soǵylýdyń aldynda tursa da, qater tumsyǵyńnyń túbine tónip kelmeı eshteńe sezbeısiń. Janyń súısingen komfort pen júregińdi baýraǵan sıqyrly atmosferanyń aýanynda terbelip kete beresiń...

Endi bireýleri- ózen órlegen shaǵyn kemeler ispettes. Joly belgili, baǵyty aıqyn. Jyldamdyǵy qalypty, ózi kúshenbese de, ózen aǵysy jolda qaldyrmaıdy. Júrisi júıelengen, tótennen tóngen qaýip joq, alǵan adamy, arqalaǵan júgi qaýisizdikte. Dala men dala, qala men qalanyń arasyn erkin sharlap, taýaryn ótkizip, adamyn jetkizip, sapary- sapaly ómirge aınalady. Jolaýshylary jaılylyqtan dandaısyp, kenetten apatqa ushyrap qalmasa, ondaı kemeniń jelkeni jyrtylyp, arqany úzile qoımaıdy. Temiri tozyp, edeni tesile bermeıdi...

Endi biri- taý ózeninen tómen quldılaǵan jeńil qaıyq sekildi. Aǵystyń qattylyǵy sonshalyq, qaıda, qashan baratynyńdy óziń sheshe de, josparlaı da almaısyń. Taıanysh taıaǵyńdy tas qyp ustap, taǵdyryńdy bir qudaıǵa tapsyrasyń. Óz baǵytyńdy óziń tańdamaq túgili, tasqa soǵylmaı, aýdarylyp túsip, apat bolmaı aman saqtalsań, soǵan da qatty rıza bolasyń. Ondaı eskekti qolǵa ustaǵan jannyń qarymy qatty, júregi táýekelshil, aqyly alysty baıqaǵysh bolady. Sarqyraǵan kóbikti sýǵa bir batyp, bir shyǵyp, urynbaı ótken qoı tasqa qorqaqtaı qarap, alǵa jyljısyń. Ózenniń jaıpaqtaý jerine jetip, jaıly qaıyqqa jaıǵasyp mingenshe, artynda otyrǵan aldyndaǵyǵa, aldyndaǵy artynda otyrǵanǵa kedergi keltirmeı, kerisinshe tepe-teńdik pen ortaq úılesimdi saqtaýǵa tyrysady. Ony saqtamaǵandardyń, kóbinde, qaıyǵy orta jolda tóńkerilip, dittegen jerine jete almaı tıtyqtaıdy...

Kelesileriniń taǵdyry tipten aıanyshty. Tartylǵan teńizdiń orynynda qaýqıyp qur qańqasy qalǵan, ishine ıt-qus dáret syndyryp, qybyrlaǵan jándik qıyn qaldyrǵan keme men qaıyqtar da bar. Atyzda ańtarylyp, qoıyn-qonyshynda syńsyǵan jel ýlep, jer baýyrlap jatqan ondaı kemelerdiń bir kezderi, aq aıdynda jelkeni jelbirep, jal-jal tolqyndy jaryp ketip bara jatqan "qýatty kúsh" bolǵanyna sengiń kelmeıdi...

Alla bizderdi panasyna alǵaı!!!

Shýaqty elde qýatty memleket quryp, eki dúnıeniń ıgiline qol jetkize bereıik!

Táýelsizdik toıy qutty bolsyn, aǵaıyn!!!