Reseı men Túrkıa Sırıa úkimetimen aradaǵy kelissózder júrgizýdiń jańa alańy retinde Astanany usynbaqshy dep habarlaıdy naryk.kz

Bul týraly búgin Reseı Prezıdenti Vladımır Pýtın Japonıanyń Premer-Mınıstri Sındzo Abemen birge ótken baspasóz konferensıasynda málimdegen, dep habarlaıdy «QazAqparat».

«Aldyńǵy kúni Túrkıa Prezıdenti Redjep Taıyp Erdoǵanmen telefon arqyly sóılesip, qaqtyǵysýshy taraptarǵa mynadaı usynys jasaımyz dep kelistik: biz óz tarapymyzdan Sırıaǵa, Túrkıa prezıdentine – qarýly opozısıa ókilderine – Qazaqstan elordasy Astana qalasyn beıbit kelissózder alańy retinde usynamyz», – dedi ol.

Onyń aıtýynsha, eger qaqtyǵysýshy taraptar osy usynysymyzdy qabyl alsa, Reseı men Túrkıa Qazaqstan Prezıdenti Nursultan Nazarbaevtan osy júıeni qabyl alýyn ótinedi.

«Eger osy oıymyz júzege assa, bul Jenevadaǵy alań sıaqty bolmaıdy. Alaıda, jenevalyq kelissózderdi tolyqtyrady», – dep atap ótti V.Pýtın.