Búgin Astana qalasynda Izraıl Premer-Mınıstri Bınámına Netanáhý myrzanyń Qazaqstanǵa resmı sapary sheńberinde qos eldiń resmı tulǵalary jáne isker toptarynyń qatysýymen Qazaqstan-Izraıl bıznes-forýmy ótti. Bıznes-forýmdy Qazaqstan Respýblıkasyndaǵy Izraıl Elshiliginiń qoldaýymen Qazaqstan Respýblıkasynyń Investısıalar jáne damý mınıstrligi, «KAZNEX INVEST» eksport jáne ınvestısıalar jónindegi ulttyq agenttigi» AQ uıymdastyrdy.
Bıznes-forýmnyń jumysyna Qazaqstan Respýblıkasynyń Premer-Mınıstri Baqytjan Saǵyntaev, Izraıl Premer-Mınıstri Bınámın Netanáhý, Qazaqstan Respýblıkasynyń Investısıalar jáne damý mınıstri Jeńis Qasymbek, Izraıl-Qazaqstan Bılateraldi Saýda-Ónerkásip Palatasynyń tóraǵasy Mıhael Roee jáne Izraıl memleketiniń Ekonomıka jáne ónerkásip Mınıstrliginiń ekonomıkalyq attashesi Elızabet Soloveva qatysty.
Qazaqstanda 2016 jyldyń 1 qarashasynda ızraıldik kapıtaldyń qatysýymen 254 kásiporyn tirkelgen, olardyń ishinde 112 kásiporyn jumys isteýde. Izraılden Qazaqstan Respýblıkasyna 2005 jyldan 2016 jyldyń birinshi jartyjyldyǵyna deıin tikeleı sheteldik ınvestısıalar 214 mln. AQSH dollaryn qurady.
Qazaqstandyq jáne ızraıldik kásipkeler ınovasıalar jáne agroónerkásiptik keshen sıaqty ekonomıkalyq sektorlarda tabysty yntymaqtasýda. Keıingi ýaqytta Qazaqstanda ızraıldik seriktestermen birlesip aqparattyq-kommýnıkasıalyq tehnologıalar salasynda jalpy somasy 86,5 mln. AQSH dollary bolatyn 7 jańa joba iske asyrylǵan. Olar – elektrondyq qurylǵylarǵa arnalǵan baspa platalaryn óndirý; qarjy jáne saqtandyrýda – birlesken Bank Hapoalim komersıalyq bankin qurý; agroónerkásiptik kesheni boıynsha – Almaty oblysynda jáne Astana qalasynda jylyjaı kesheniniń qurylysy, tamshylatyp sýarýdyń jańa júıelerin engizý, Soltústik-Qazaqstan oblysynda broıler qus fabrıkasynyń qurylysy sıaqty jobalar bar; ınfraqurylym boıynsha – Mańǵystaý oblysynyń aýmaǵynda teńiz sýyn tushshytý qondyrǵysynyń qurylysy bar. Qazirgi ýaqytta medısınalyq saqtandyrý jelisin jáne «Arhımedes Qazaqstan» medısınalyq ortalyqtar jelilerin qurý boıynsha joba iske asyrylýda.
Bıznes-forým kezinde onyń qatysýshylary Izraıldiń ınovasıalar men joǵary tehnologıalar salasyndaǵy tájirıbesin, sondaı-aq ınfraqurylym, jańa tehnologıalar, hımıa jáne agroónerkásiptik keshen salalaryndaǵy kelesi jobalardyń keleshegin talqylady. Olardyń qatarynda modýldyq qurylǵylardyń óndirisi, ZD – prınterlerge jáne addıtıvti mashınalarǵa arnalǵan mamandandyrylǵan untaqtardyń óndirisi, lak-boıaý buıymdarynyń óndirisi, aýyl sharýashylyǵy ýchaskelerin qurý jobalary bar.
Bıznes-forýmda qazaqstandyq jáne ızraıldik taraptardyń arasynda birqatar qujattarǵa qol qoıyldy: QR Bilim mınıstrligi men Mitrelli ızraıldik kompanıasynyń arasynda yntymaqtastyq týraly memorandýmǵa, «Korporasıa BAZIS-A» JSHS men BAL International LTD arasyndaǵy ózara túsinistik pen yntymaqtastyq týraly memorandýmǵa, «Damar» JSHS men EGRZ FOOD LTD arasyndaǵy kelisimge jáne taǵy da basqa kelisimderge qol qoıyldy.
Bıznes-forým jumysyna qos eldiń bıznes jáne úkimettik emes uıymdarynyń 400-den astam ókili qatysty. Izraıl tarapyna Qazaqstan Respýblıkasyn ındýstrıalyq-ınnovasıalyq damytýdyń 2015-2019 jyldarǵa arnalǵan Memlekettik Baǵdarlamasy, ınvestorlarǵa arnalǵan, onyń ishinde shaǵyn jáne ekonomıkanyń basym salasyndaǵy orta bıznesti yntaldandyrý toptamasynyń tusaýkeserin, jáne arnaıy ekonomıkalyq aımaqtardyń (AEA) jáne ındýstrıaldyq aımaqtardyń (IA) tujyrymdamalary tanystyryldy. Plenarlyq sesıalar men ekijaqty kezdesý kezinde kásipkeler aýyl sharýashylyǵy, densaýlyq saqtaý, sý sharýashylyǵy, qaýipsizdik jáne jasyl energetıka salalaryndaǵy birlesken jobalardy talqylady.
Qosymsha aqparat alý úshin kelesi elektrondy meken-jaıyna jáne baılanys telefondaryńyzǵa habarlasýǵa bolady: pr@kaznexinvest.kz, +77172919040 ishki: 1090
Anyqtama úshin
Qazaqstan men Izraıl arasyndaǵy taýar aınalym 2015 jyly 306 mln. AQSH dollaryn qurady. Qazaqstandyq eksporttyń úlesi 219,1 mln. AQSH dollaryn, ımporttyń úlesi 86,9 mln. AQSH dollaryn qurady. Qazaqstandyq eksporttyń negizgi baptary: mıneraldyq otyn, munaı, tuz jáne kúkirt, ushý apparattary, baǵaly emes metaldar jáne daqyldar bolyp tabylady. 2016 jyldyń 9 aıynda taýar aınalymy 237 mln. AQSH dollaryn qurady. Importtyń negizgi baptary: elektr mashınalary jáne jabdyqtar, ıadrolyq reaktorlar, qazandyqtar jáne mehanıkalyq qurylǵylar, optıkalyq aspaptar jáne apparattar, kóknisterdi jáne tyńaıtqyshtardy óndeý ónimderi bolyp tabylady.
KAZNEX INVEST
Qazaqstan Respýblıkasy Investısıalar jáne damý mınıstrliginiń «KAZNEX INVEST» eksport jáne ınvestısıalar jónindegi ulttyq agenttigi» Aksıonerlik qoǵamy – qazaqstandyq shıkizattyq emes eksportty ilgeriletý men damytýǵa jáne ekonomıkanyń basym sektorlaryna tikeleı sheteldik ınvestısıalardy tartýǵa yqpal etetin ulttyq damý ınstıtýty.
