Ótken aptada redaksıamyzǵa Janat Qurshaneva esimdi kelinshek habarlasty. Ol Ońtústik Qazaqstan oblysynda týyp-ósken, biraq búginde Almatyda turady, ondaǵy «Baraholka» dep atalyp ketken bazarda saýda isteıdi eken.

Janat Qurshanevanyń jasy qazir 24-te eken. Ol bizge ulty ózge bireýdiń ózin «óltirip ketemin» dep qorqytyp júrgenin aıtty. Sebebin suraǵanymyzda basynan ótken oqıǵany baıandady. Biz onyń aıtqandaryn esh ózgerissiz jarıalaýdy jón kórip otyrmyz.

«Men «Birinshi Almaty» jaqta páter jaldap turamyn, – deıdi J.Qurshaneva. – Úı jaqtaǵy dúkennen kerek -jaraǵymdy satyp alyp júretinmin. Dúkenniń qojaıyny anda-sanda ádemisiń dep tıisetin. Bir kúni avtobýstan túsip, úıge kele jatqanymda ol aldymnan shyqty. «Menimen júr, jaıly páter kórsetemin», – dedi. Men: «Kerek emes, páterim bar ǵoı, úıge kele jatyrmyn», – dep óte bergenimde ol meni soqqyǵa jyǵyp ketti. Men «102»-ge «zvondap», onyń ústinen polısıaǵa aryz jazdym. Ol menen keshirim surap, aryzymdy qaıtyp alý úshin 400 myń teńge berdi. Men  sosyn ony keshirip, aryzymdy qaıtyp aldym. Al onyń bergen aqshasyna 170 myń teńge qosyp, «Baraholkadaǵy» saýdamdy jalǵastyra berdim. Keıin páter taýyp, sol jaqqa qaraı kóship ketkenmin. Jaqynda sol kisi basyma pıstolet taqap qorqytyp, 570 myń teńgem men moınymdaǵy trosymdy, neke júzigimdi tartyp áketti. Men qaıtadan aryzdandym, prokýratýraǵa da jazyp jatyrmyn. Biraq odan ázirge eshqandaı nátıje joq. Al álgi qaraqshy: «Aryz jaza ber, odan saǵan paıda joq. Men seniń qaı jerde turatynyńdy bilip aldym. Úıińe bomba qoıyp, óltirip ketemin», – dep qorqytyp júr. Endi men ne isteımin?»

Osylaı degen J.Qurshaneva bul jóninde gazetimizde jazýdy ótindi. «Quqyq qorǵaý oryndary bul jóninde bilip, zombylyq jasaýshyny jónge salsa, meni qorǵasa eken», – deıdi ol.

Derekkóz: zamana.kz

Avtor: G. Áshirbekova