Endi mekteptegi túrli is-sharalar men merekelik konsertter «Uly dala balasy Tóreǵalı Tóreáliniń atyndaǵy májilis zalynda» ótedi eken. Atalmysh zaldy ashý ıdeıasyn oqýshylar mektep basshylyǵyna usynǵan. Olar balalardyń usynysyn qabyl alyp, Almaty qalasynyń ákimdigimen kelise otyryp, «Uly dala balasy Tóreǵalı Tóreáli atyndaǵy májilis zalyn» ashqanyn aıtqan bolatynbyz. Osy jaıly Respýblıkalyq «QAZBİLİM» ortalyǵy dırektory, aqyn Aıatjan Ahmetjanuly Facebook paraqshasynda mynadaı pikir bildiripti:
Balapan uıada neni kórse, ushqanda sony alady...
Áli esimde stýdent edik, 2010 jyly bolsa kerek (naqty esimde joq) Astana qalasynyń sol kezdegi ákimi Imanǵalı Nurǵalıuly qaladaǵy №54 mektep-lıseıine bardy, Aqseleý aǵa qaıtys bolǵannan keıin bir jyldan soń, mektepke bolashaqta Aqseleýdiń marqumnyń aty beriledi, zań boıynsha tulǵanyń atyn qaıtys bolǵannan keıin, tek bes jyldan soń ǵana memlekettik nysanǵa, kóshege t.b ǵa berýge bolady, - dedi, kádimgideı qýanyp qaldym. Aqseleý marqumnyń Astana qalasynyń kóshe attaryn qazaq tarıhyna baılanystyrýǵa qosqan eńbeginiń ózi ǵana bir mektepke atyn berýge laıyq, budan tys ushan eńbegi she?
Átteń, odan beri alty jyl aýnady, qaıtys bolǵaly bıyl 7 jyldan asyp ketti, biraq sol №54 mektep-lıseıi áli beıresmı ǵana Aqseleý aǵanyń atynda, al qujat júzinde áli oryndalǵan joq.
Bul naqty esimde, 2012 jyly 4 naýryz kúni edi, Astana qalasy №66 mektep-lıseıinde Alash partıasynyń 95 jyldyǵyna oraı is-shara ótti, is-sharanyń ótýine Berik Ýálı aǵa bastaǵan Nurotandyqtar sebepker boldy. Sol is sharada Álıhan Bókeıhan týraly derekti fılm kórsetildi. İs sharada Tursyn Jurtbaı aǵa, Erlan Qarın aǵa, taǵy biraz atqa miner aǵalar bar. Sol is-sharada Aınur atty 10- synyp oqýshysy shákirtim aǵalar osy mektepti Álıhan atanyń atyna bereıikshi, sizder osyǵan muryndyq bolyńyzdarshy, - dedi, árıne aǵalardyń tileýi de osy edi... Qýana qoldady. Árıne, bir túıir ótirik qossam dosym Serik Joldasbaı kýá. Ol kezde men sol mekteptiń hımıa páni muǵalimi edim, Álıhan Bókeıhanov atyndaǵy mektepte isteımin dep biraz ýaqyt maqtanyp júrdim...
Odan beri bes jylǵa jýyqtady... Bıyl Álıhan Bókeıhannyń 150 jyldyq mereıtoıyn álem toılady, biraq, sol mektep te, Astanadaǵy basqa mektep te Alash kóseminiń atyna buıyrmady... Kelesi jyly Alash partıasynyń 100 jyldyǵy, bálkim buıyryp qalar... kim bilsin...
Bárinen de sol Aınur degen qyz anda-sanda jolyǵa qalsa suraıdy, men amalsyz betimdi basamyn...
Keshe ǵana Almaty qalasy №157 mekteptiń májilis zalyna Tóreǵalı Tóráliniń aty berildi, - dedi, artynan aqparat resmı túrde rastaldy. Áli esimde Tóreǵalıdi tuńǵysh ret 2009 jyly kóktemde Taldyqorǵanda aıtysta birge bolǵanbyz, sol jerge Qaınar Alakóz ertip barǵan, jańylmasam 9- synyp oqýshysy, sahnaǵa jańa shyǵyp júrgen kezi edi, odan beri on jyl bolǵan joq, ıaǵnı Tóreǵalı sahnada óner kórsetkeli on jylda tolmady... Al keshe...
Atyn berýge el aýyzyndaǵy eki ýáj, shyn ótirigin bilmeımin, biri majilis zalyn Tóreǵalı jasaqtap beripti, ıá, jasaqtap bersin, mektepke kómektesse ne bopty, biraq kómektesti eken dep atyn bere berse memlekettik mekemede ne qun qalady, eger jasaqtap berse atyn beretin bolsa joǵaryda atyn ataǵan aǵalar Alash qaıratkerleri atynan álde neshe mekteptiń májilis zalyn jasaqtap berýge shamasy jetedi, nıetti de... Tek Alashtyqtardyń atyn berse boldy, tipti Serik Joldasbaı ekeýmiz aq bir Alashtyqtyń atynan jasaqtap bereıik, atyn bersin...
ekinshi ýáj, mektep basshylyǵy Tóreǵalıdy qatty jaqsy kóredi-mys...Tipti kúlli qazaqtyń búgini úshin ter tókken tulǵalardan da qatty ma? Tárbıe beredi degen mekteptiń dırektory essiz estradanyń fanaty ma?
Men basqadan emes tek sol mektepte oqıtyn oqýshylardan uıaldym, Tóreǵalı nege uıalmady, saýatsyz dırektor nege mektep basqaryp otyr, ol kimge úlgi túsinbedim...
Negizi «Uly dala balasy» degen sózdiń ózi uıattaý, basqamyz qury dalanyń balasymyz ba?
P.S. Biz urpaqqa ne tárbıe beremiz? Kim bol deımiz? Astymyzdaǵy baılyqty ánmen ashyp, jerimizdi ánshi qorǵaıma? Erteń bul úrdis jalǵassa... Endi olar qaıtsyn, balapan uıada neni kórse ushqanda sony alady... al, biz balapandarǵa kórsetetinimiz osy ǵana bolyp tur...
Ary qaraı sózim joq...
Al endi patrıot urpaq tárbıeleımiz dep urandaǵannyń bári ótirik... Sóz emes, is kerek!, – dedi ol.
Facebook-taǵy bul jazbasyna adamdar kelisetinin aıtyp, mynadaı pikirler de qaldyrǵan:
«2010 jyly N54 mektepte jumys jasadym, Seıdimbekke arnalǵan murajaı ashyldy, mektepke atyn beremiz degendi men de estidim. 2012 jyly N66 mektepte bolǵan jınalystyń da kýási boldym, ol kezde fızıka páninen dáris berdim. Aıatjannyń aıtyp otyrǵany shyndyq, aıtylǵan ýádeler oryndalmady. Sandarmen atalatyn mektepterdi Halyqtyń zıaly azamattarymen atalsa jarasymdy bolar edi. Al Tóreǵalı aýzynan ana súti keppegen jas bala,ataqty aqshamen esepteý durys emes. Ustaz psıxolog qoı, 38-jyl ustazdyq oıym osy» dese, biri: «Aıeke jaqsy aıttyń. Oqýshy qyzdyń usynysy barshamyzdy qýantyp edi. Bul týraly kezinde Alash aınasy gazeti jazdy. Ókinishke qaraı áli kúnge deıin iske aspaı otyr»,- deıdi.
«Álıhan Bókeıhanovtyń atyna bir medrese (oqý nysanyn -Á.N.) ashý týraly "228 partıada jumys qylǵan Jetisý oblysy Qapal ýeziniń 700 jigiti, Torǵaı oblysy, Aqtóbe ýeziniń......94 jigiti Ǵalıhan Bókeıhanov atyna dep ıa medrese, ıa stependıa ashý jolyna arnap eki myń som jıyp" 1917 jyldyń maýsym aıynda bastama kótergen. Shákárim osy bastamany qoldap, "Saryarqa" gazetinde arnaıy maqala jazǵan. Eldi ún qosýǵa shaqyrǵan.
Mine, bir ǵasyrǵa taıap qalypty. Sol bastama áli kúnge deıin syıyrquıymshaqtalyp kele jatyr. Ókinishti, árıne! Ulylarymyzdy árdaıym osylaı ulyqtaı bersek, bul másele de sheshiledi...»
«Shynymende asyl men jasyqty aýystyryp aldyq....»
«Aıatjan óte oryndy jazdyńyz.
Buryn xalyqtyń eń Ardaqty uldaryn maqtan etip, atyn urpaqtarymyz bilip júrsin dep,kóshe,mektep,mádenıet oryndarynyń atyn berýshi edik, endi bir-eki toıǵa arnap án salatyn "ánshisymaqtar" ordendi de alyp, depýtat ta bolyp, májilis zalynyń atyn alatynyn estip jatyrmyz.
Alashtyń Álıxanynyń, qazaqtyń Aqseleýinen ardaqty kim bar?!
Ekeýi de eki mekteptiń atyna laıyqty. Sol mekteptiń oqýshylary maqtan eter edi!» degen sıaqty pikirler qaldyrǵan.
