Ǵalamtordyń jat aǵymdardyń nasıhat oshaǵyna aınalyp otyrǵany jasyryn emes. Dinı tanymnan habary az jastar osyndaı jelilerge kirip, baıqamaı bireýdiń qazǵan orlaryna túsedi. Aqmola oblysynda bir jas azamatqa qatysty sot prosesi bastaldy. Ol álgindeı jelide otyryp, jıhadqa úndeıtin aqparatqa «laık» basqan.  Bul týraly Aqmola din isteri basqarmasy basshysynyń mindetin atqarýshy Bolat Qasenov  málimdedi  dep habarlaıdy bnews.kz.

Bir qaraǵanda budan ne ózgerdi deısiz ǵoı. Jańaǵy bilmestikten basqan «laık» sol jelidegi jat aǵymnyń nasıhatyn taratý dep esepteledi eken. Sebebi, ol ózi oqyǵan aqparatqa laık basyp qana qoımaı, ony óz dostaryna taratqan. Demek, ol ǵalamtordaǵy zańsyz aqparatty taratýshylardyń biri sanalady.

«Jat aǵymnyń ókilderi jastardy ózderine tartý úshin  áleýmettik jelige Quran men hadısten  asyl sózderdi keltirip, bir jerinde ǵana jıhadqa shaqyrýy múmkin. Bul da adamdy Quran aıattary arqyly baýraýdyń bir quıtyrqy joly. Ańqaý adam Quran aıatyna laık basyp jatyrmyn dep oılaýy múmkin. Biraq, ol jańaǵy jat aǵymnyń teris nasıhatyn taratýshy bolyp shyǵa keletinin ańǵarmaıdy»,–deıdi Aqmola din isteri basqarmasy basshysynyń mindetin atqarýshy Bolat Qasenov.

Búginde túzetý mekemeleri sáláfılik aǵym ókilderiniń de jazasyn óteý ornyna aınaldy. Jergilikti din basqarmasy men teologtar da olardy raılarynan qaıtarý úshin qyrýar jumys isteýde. Aqmola oblysynda syrttan aldyrylǵan bir ǵana teolog bar. Onǵa tarta túzetý mekemesindegi jazasyn óteýshilermen onyń jeke jumystary nátıjesin bere me?! Bıyl oblys boıynsha túzetý mekemelerinde 16 adam raılarynan qaıtyp, dástúrli dinimizge oraldy.

Aqmola oblysynyń ádilet jáne basqa da quzyrly organdarynda barlyǵy 122 dinı uıymdar jáne 70-ten asa mısıonerler tirkelgen. Din basqarmasynyń ókili tirkeýden bas tartyp, ózderiniń nasıhat jumystaryn zańsyz júrgizýge tyrysatyndar da joq emestigin de atap ótti.

«Elimizdegi din salasyndaǵy zańda dinı ǵıbadat ornynan tys jerde óz nasıhattaryn júrgizýge tyıym salynady delinedi. Ákimshilik quqyq buzýshylyq zańdarymen ondaı zań buzýshylarǵa 50-den 200-ge deıingi aılyq eseptik kórsetkish kóleminde aıyppul salynatyny da aıtylady. Biraq, adamdardyń bári zańdy oryndaı bermeıdi. Arnaıy belgilengen oryndardan tys jerlerde dinı ádebıetter taratady. Qarapaıym adamdardy óz qarmaqtaryna túsirip, arbaıdy, aldaıdy», – deıdi B.Qasenov.