Adam ábden shyrt uıqynyń qushaǵyna batqan kezde kóleńke oǵan qosh aıtysa kelip bylaı deıdi: 
Ózim jaqtyrmaıtyn nárse jánnatta bolsa, oǵan barǵym kelmeıdi;
Ózim jaqtyrmaıtyn nárse tozaqta bolsa, oǵan barǵym kelmeıdi;
Ózim jaqtyrmaıtyn nárse senderdiń bolashaq altyn syrǵalaryńda bolsa, oǵan barǵym kelmeıdi. 
Al men seni jaqtyrmaımyn. 
Dosym, meniń saǵan ergim kelmeıdi, meniń turǵym joq. Men razy emespin! 
O, dárıǵa, o, dárıǵa, men razy emespin, búıtkenshe meniń qý medıende sendelgenim abzal. 
Men bir kóleńke ǵanamyn. saǵan qosh aıtyp, qarańǵylyqqa ǵaryq bolǵaly turmyn. Al qarańǵylyq meni taǵy jutpaq, jaryq shuǵyla da meni zym - zá joǵaltyp jibermek. 
Meniń jaryq pen qarańǵylyq arasynda sendelgim kelmeıdi, Onan qarańǵylyqqa batyp ketkenim maqul. 
Biráq, men aqyry jaryq pen qarańǵylyq arasynda sandalyp qaldym, ymyrt ekenin de, tań sáýlesi ekenin de bilmeımin. Ázirshe, kúıedeı qara qoldarymdy kóterip bir kese araq simirgen adam qápatynda, qaı mezgil ekeni belgisiz, bir mezgilde jalǵyz ózim alysqa tartyp ketpekpin. 
O, dárıǵa, o, dárıǵa, eger bul ymyrt bolsa, qarańǵy tún meni shym batyryp áketer edi nemese tap qazyr tań mezgili bolsa, onda men kúndizgi jaryqqa sińip joǵalar edim. 
Dosym, ýaqyt taıap keledi. 
Men qarańǵylyqqa qaraı yqtap, qula medıende sendelmekpin. óziń menen birdeme dámetetin kórinesiń, mende bere qoıarlyq ne bar dep ediń? amal joq, bar bolǵany qarańǵylyq pen bos qulazý ǵana, biraq meniń tileıtinim − qarańǵylyq nemese seniń kúndizińe sińip joǵalsam deımin. Meniń tileıtinim − qulazý ǵana, Áste seniń júregińe uıalaǵym joq. 
Meniń osylaı bolǵym keledi, dosym. 
Men japadan - jalǵyz alysqa tartamyn, bir sen ǵana emes, basqa kóleńke ataýly baspaıtyn qarańǵylyqqa qaraı tartpaqpyn, qarańǵylyq jutyp ketse- aq bolǵany, ol dúnıe tutas ózimdiki bolmaq.

Aýdarǵan: Ábdildabek Aqyshtaı