29 jasar Djoanna Ýotkıns óz kúıeýimen bir bólmede otyra almaıdy. Sebebi Djoannanyń shyrly jasýshalary jandanǵan. Bul ımmýndik júıeniń óte sırek kezdesetin túri. Iaǵnı qalypty adamnyń ımmýndik júıesi syrtqy qaýipti faktorlardan qorǵasa, Djoannaniki kerisinshe qaýip tóndiredi.  Nátıjesinde barlyǵyna derlik onyń ishinde kúıeýine de alergıasy bar. Djoannada da kez-kelgen ýaqytta anafılaktıkalyq shok bolýy múmkin. Bul onyń ómirine qaýip tóndiredi. Ol kez-kelgen ýaqytta kóz jumýy múmkin.

Djoanna men Skott Ýotkınstiń qarym-qatynasy ádettegi otbasynan aıryqsha.

«Skott ekeýimiz keıde birge teledıdar kóremiz. Biz bir bólmede otyra almaımyz. Sebebi men de oǵan alergıa bar. Sondyqtan ol óz noýtbýgimen tómende otyrady. Osylaısha ekeýimiz bir ýaqytta bir shoýdy kórip, messendjer arqyly ony talqylaımyz» deıdi Djoanna.

Djoanna úıdiń shatyrynda  turady. Barlyq esik pen terzeler sańylaýsyz. Bólmege aýa arnaıy fıltr arqyly kiredi.  

Nekege otyrarda Ýotkınster Djoannanyń dertiniń qanshalyq kúrdeli ekenin túsinbedi.

2013 jyly Djoanna Skotqa kúıeýge shyqqanda aýrýynyń tez asqynatynyn baıqamady.

«Úsh, tórt jyl buryn Djoanna ekeýimizdiń betterimiz bir-birimizge jaqyndap ketse ol birden jótele bastaıtyn» dep eske alady Skott.

Tek ótken jyly ǵana olar fızıkalyq túrde birge tura almaıtynyn túsindi.

«Skott bólmege kirgende meniń jaǵdaıym kúrt nasharlaıdy. Bir kúni ol shashtarazdan kelgennen keıin bólmege kirdi. Eki mınýttan keıin-aq men de anafılaktıkalyq sımptomdar paıda boldy».

Bir apta ótkennen keıin Skott qaıta áıelin kórýge talpyndy. Alaıda dál sol jaǵdaı qaıtalandy. Sol ýaqytta ómirlerinde kóptegen ózgeris oryn alatynyn túsindi.

«Meniń aǵzam kúıeýime keri reaksıa berdi. Buǵan deıin de týystarym, dostarym jaqyndaǵanda osylaı bolatyn. Alaıda Skotqa kelgende jaǵdaı múlde ýshyǵyp ketti».

Djoanna men Skottyń toıy

Djoannaǵa qandaı da em nemese dári-dárimek áser etpeıdi. Bul jaǵdaı qashan ózgeretinin bilmeıdi. Ómir boıy eshqandaı ózgeris bolmaýy da yqtımal.

«Bul máseleni sheshýdiń ońaı joly joq. Men Djoannanyń baqytty bolýyn qalaımyn. Biraq ony fızıkalyq túrde kórsem, onyń ómirine qaýip tónedi. Oǵan kómektesý úshin men oǵan jaqyndamaýym kerek. Biraq bizdi eshteńe ajyrata almaıdy. Biz qansha ýaqyt qajet bolsa, sonsha ýaqyt kútýge daıarmyz» deıdi Skott.

«Toıda bizdi ólim ǵana ajyrata alady dep sert berdik. Taǵdyrdyń túrli synaqtaryna qaramastan dám tuzymyz taýsylǵansha birge bolýǵa daıynbyz. Men 90 jasqa deıin osy aýrýmen aýyrsam da, kúıeýimnen bas tartpaımyn. Ony únemi jaqsy kóretin bolamyn» deıdi Djoanna.

Djoanna men Skott bir-birine qol tıgize almaıdy

Ýaqyt óte kele qalyptasqan jaǵdaı Skottyń ashýyn keltirdi.

«Men osy ómirdi qabyldaǵanǵa deıin kóp oılandym. Barlyǵyn tarazyǵa saldym. Nátıjesinde áıelimmen birge bolǵym keletinimdi túsindim. Biz kóp sóıleskendi jaqsy kóremiz. Árqaısymyzdyń ómirimizde ne bolyp jatqanynan habardarmyz. Bul keremet. Biz fızıkalyq turǵyda birge bola alatyn kúnge jetkenge deıin osylaı bolmaq» deıdi ol.

Skott mektepte muǵalim bolyp jumys isteıdi. Kúnde jumystan qaıtqannan keıin ol Djoannaǵa keshki as daıyndaıdy.

«Men oǵan tek osylaı ǵana kómektese alamyn. Mine bir jyl boldy dostarymnyń biri úıge kelip, Djoannaǵa as daıyndaýǵa kómektesedi. Oǵan tek eki tamaqty ǵana jeýge bolady. Bir jyl boıy ol tek sol taǵam  túrimen ǵana qorektenip keledi».

Djoannaǵa em qonbaıdy, tipti hımıa terapıada kómektespeıdi

Qazir Djoanna men Skott Olsondar degen tanystarynyń úıinde turyp jatyr. Sebebi olardyń úıinde Djoannaǵa qaýipsiz bolatyndaı jóndeý jumystary júrgizilip jatyr. Olsondar ıistendirgishi bar azyq-túlikti múlde qoldanbaıdy. Úıde taǵam daıyndaýdy da qoıǵan.  

«Eger jeldiń baǵyty ózgerip men qandaı da bir ıisti sezsem birden alergıalyq reaksıa paıda bolady. Men úıdiń shatyrynda turamyn. Eger bireý tómende pıaz týraı bastasa men de alergıalyq reaksıa paıda bolady» dep túsindirdi.

Djoanna shatyrdan tek aýrýhanaǵa nemese dárigerge barý qajet bolǵanda ǵana shyǵady. Ár kúni ol mýzyka tyńdap, elektrondy hat jazysyp, vıeo arqyly týystarymen sóılesedi.  

Onda tek aǵasy men ápkesine ǵana alergıalyq reaksıa joq. Djoannanyń bólmesine kirý úshin olar bir kún boıy dámdeýishtersiz tamaq jeý kerek. Arnaıy sabynmen jýynyp, túgeldeı sheshinip, Djoannanyń bólmesinen shyqpaǵan arnaıy kıim men muryn men aýyzdy jabatyn maska kıip qana kiredi. Bul saqtyq sharalaryna qaramastan olar ár kelgen saıyn onyń jaǵdaıy nasharlaıdy. Biraq Skottpen bir shańyraq astynda turyp jatqany jáne onymen telefon arqyly sóılese alatyny oǵan kúsh beredi.

«Meniń ómirimde kóptegen jaqsylyqtar boldy. Sol úshin taǵdyryma rızamyn. Munyń barlyǵy men ózim týraly ǵana oılamaýym kerek ekenin eske salady». 

Derekkóz: bbc.com

Aýdarǵan: Ásem Álmuhanbet