«Balańdy esińe al – alıment tóle» jobasy aıasynda 300-den astam boryshker jumysqa ornalastyryldy dep habarlaıdy astana.gov.kz.

Astanada «Balańdy esińe al – alıment tóle» jobasy aıasynda 300-den astam boryshker jumysqa ornalastyryldy. Sondaı-aq taǵy 9 adam qyzmetke ornalasý úshin qajetti qujattardy jınaýda, 10 adam kompanıalardyń jaýabyn kútýde, dep habarlady Astana qalasynyń prokýratýrasy.

Jobanyń maqsaty - jumyssyzdardy qyzmetke ornalastyrý arqyly alıment tólemeıtinderdiń sanyn azaıtý.

Jumyspen qamtý basqarmasynda qyzmet isteýge nıet tanytqan jumyssyz boryshkerlerdiń (bilikti elektrıkter, santehnıkter, ekonomıser men zańgerler) tizimin ázirledi.

Bul bastamany astanalyq qurylys kompanıalary qoldap, alıment tólemegen 700 boryshkerdi qyzmetke alýdy usyndy. Boryshkerlerdi jumysqa qabyldaý prosedýrasy bastaldy. Olardyń jalaqylary 100 myń men 200 myń teńge shamasynda bolmaq.

Ádilet departamenti ǵımaratyndaǵy jumys toby kún saıyn turǵyndardy qabyldap, boryshkerlerdiń meken-jaılary boıynsha reıd júrgizedi. Sondaı-aq qaryzyn tóleýden jaltaryp júrgenderdi izdestirý sharalary uıymdastyrylady.  Boryshkerlerden 23 mln teńgeden astam qarjy óndirip alyndy, kámelettik jasqa tolmaǵan balalaryna berildi, 45-i ákimshilik jaýapkershilikke tartyldy.