Esirtki satty degen aıyppen Qytaı Halyq Respýblıkasynyń túrmesinde otyrǵan Qazaqstan azamatshasy Aqjarqyn Turlybaı qazir qytaı túrmesinde jumys istep júr, dep habarlaıdy «QazAqparat» HAA-nyń QHR-daǵy menshikti tilshisi.
«Aqjarqyn tergeý abaqtysynda birrettik paketterge qolǵaptar men basqa da buıymdardy salyp, qaptaıdy. Aqjarqyn kúnde Qytaı teledıdary arqyly jańalyqtardy tyńdaı alady (kúnine 1-1,5 saǵat teledıdar kórýge ruqsat etilgen - agenttik). Aqjarqyn kelesi joly otbasymen birge túsken sýretterin berip jiberýdi ótindi. Kózildirik máselesin sheship berdik. Buryn onyń kamerasynda ystyq sý bolmaǵan, qazir bul másele de sheshilgen», - dedi QazAqparat tilshisimen áńgimelesken QHR-daǵy Qazaqstan Elshiliginiń konsýldyq bólim jetekshisi Bolat Syrlybaev.
Dıplomat búgin Gýanchjoýdaǵy tergeý ızolátorynda Aqjarqynmen kezdesip, 40 mınýttaı áńgimelesip qaıtty.
B.Syrlybaevtyń aıtýynsha, qazir Aqjarqynnyń kóńil-kúıi jaqsy. Kelesi - merekelik aptada Aqjarqyn jumysqa tartylmaıdy jáne 16 adammen birge kamerasynda demalady.
Dıplomat Aqjarqyndy aqpan aıyndaǵy týǵan kúnimen quttyqtap, kartochkasyna azdap aqsha salyp berdi. Aqpan aıynda Aqjarqyn 23 jasqa tolady.
Dıplomat búgin sondaı-aq, Gýanchjoý qalasynda ustalǵan qazaqstandyq taǵy birneshe azamatpen kezdesedi.
B.Syrlybaev qazaqstandyq qorǵaýshy Suńqar Nurmaǵambetovtiń Aqjarqynnyń soty 27-28 aqpan kúni ótedi degen málimetti rastaǵan joq.
Eske sala keteıik, Aqjarqyn Turlybaı 2014 jyldyń naýryz aıynda Gýanchjoý áýejaıynda 4,5 keli esirtkimen ustalǵan bolatyn.
Ol Malaızıaǵa sándi kıimderdiń kýreri bolyp jumys jasaýǵa attanǵanyn aıtyp ketken. Qyzdyń ózi esirtkini oǵan arandatýshylar salyp jibergenine senimdi.
Bul iske qatysty Qytaı soty aýyr jaza taǵaıyndap, ony ómir boıy bas bostandyǵynan aıyrǵan bolatyn.
Alaıda keıin, esirtki, psıhotropty zattardyń zańsyz aınalymymen kúres Ortalyq Azıalyq aımaqtyq ortalyǵy jas qyz nıgerıalyq esirtki mafıasynyń qurbany bolýy múmkin ekenin aıtqan.
2016 jyldyń 7 sáýirinde apelásıalyq sot satysy Aqjarqyn Turlybaıdy ómir boıyna bas bostandyǵynan aıyrǵan sot úkiminiń zańdy kúshin toqtatyp, alǵashqy sot satysyna isti qaıta qaraý týraly qaýly shyǵarǵan.
