Qazaqstandyq dıplomattar azyq-túlik dúkeninen taǵy bir Qazaqstan azamatyn bosatyp aldy, ol – Shymkent turǵyny Ertaı Erejepov. Qazaqstannyń Máskeýdegi elshiliginen jábirlenýshiniń anasy kómek suraǵan dep habarlaıdy "KTK" telearnasy.

Jumys izdedim Júk tasýshy qyzmeti týraly habarlandyrýdy Ertaı Erejepov jergilikti gazetten taýyp alady. Habarlandyrýda kórsetilgen telefonǵa habarlasyp, Ertaı Saratovta jumys isteý kerektigin biledi.

"Qarasam jumys orny bar eken: "Júk tasýshy kerek" dep tur. Habarlastym. Tutqany bir qyz kóterdi. Onymen sóılessem, "osyndaı bir jumys bar, biraq Qazaqstanda emes, Reseıde, Saratov qalasynda. Júk tasýshy" deıdi. Men jaraıdy, kezdeseıik dedim. Kezdestik. Ol: "Dúken ápkemdiki, kúıeýi de sonda, qazaqtar, qoryqpa! Ózimizdiń shymkenttikter!" — dedi. Men kelistim. Senip qaldym", — deıdi Ertaı Erejepov telearnaǵa. Jigitpen áńgimelesken qyz – azyq-túlik dúkeni ıesiniń týysy. Ol Ertaıǵa Máskeýge deıin bılet alyp berip, áýejaıǵa shyǵaryp salady. Máskeýden Saratov qalasyna ózi jetýge tıis bolatyn, alaıda máskeýlik áýejaıda dúken ıesi Jansulý Istanbekovanyń kúıeýi kútip alady. Ol jigitti Golánovo aýdanyndaǵy dúkenge alyp baryp, qujattary men telefonyn tartyp alady.

Qashý

Qazaqstandyq on kúnnen soń ǵana qashyp shyǵa aldy, ol bir apta boıy Máskeý soborlyq meshitinde turǵan. Jansulý Istanbekovadan Ertaıdyń tólqujatyn qaıtaryp alýǵa meshitte turatyn myqty jigitter kómektesken. Erejepovtyń aıtýynsha, ol Qazaqstan elshiligine barǵanymen, eshqandaı kómek bolmapty. Alaıda syrtqy ister mınıstrligi bul aqparatty teriske shyǵarady.

"Azamattyń ótinishinen soń bizdiń dıplomattar kórsetilgen dúkenge baryp, psıhologıalyq qysym kórsetý arqyly Erejepovtyń qujattaryn qaıtaryp alady da, ózine ustady. Budan bólek, Qazaqstanǵa qaıtýǵa qarajaty bolmaǵandyqtan, dıplomattar jigitke poıyzben otanyna oralýǵa kómektesken", — dep túsindirdi QR SİM baspasóz qyzmetiniń basshysy Ánýar Jaınaqov.