Aqtóbede jergilikti tis emdeý mekemesinde arnaıy operasıa ótip, tis dárigerin kepilde ustaǵan er adamnyń kózi joıyldy. Er adam burynǵy áıelin alyp kelýin talap etken, bul talaby oryndalmasa kepildegi áıeldi óltiremin dep qorqytqan, - dep habarlaıdy tengrinews.kz.
Jergilikti turǵyn tis dárigerin mekeme ǵımaratynyń ishinde kepilge alǵan. Aldyn ala málimet boıynsha, bul stomatologıada onyń burynǵy áıeli jumys istegen. Oqıǵa keshki ýaqytta bolǵandyqtan, medmekemeniń ǵımaratynda klıent bolmaǵan, tek personaldan birneshe adam qalǵan. Oqıǵa "Batys" aýdanynda boldy.
Áleýmettik jelilerde Aqtóbe turǵyndary oqıǵa ornynan sýret pen vıdeolar jarıalap jatyr. Kýágerler oqıǵa ornyna tipti tikushaqtyń qonǵanyn aıtty.
"14 naýryzda saǵat 19.00-de Aqtóbe polısıasyna belgisiz er adamnyń stomatologıa ákimshisi - 1991 jylǵy azamatshany kepilge alyp, óltiremin dep qorqytqany jaıly habar tústi. Er adamnyń qolynda pyshaq bolǵan. Polısıa oqıǵa ornyna kelgennen keıin qylmyskerdiń jeke basyn anyqtady, ol 1993 jylǵy azamat, jumyssyz, 2016 jyly urlyq úshin qylmystyq jaýapkershilikke tartylǵan", - dep habarlady Aqtóbe oblystyq İİD ókilderi.
Polısıanyń málimetinshe, qalalyq azamat ózimen jasty burynǵy áıelin ákelýdi talap etken. Ekeýi 7 naýryza ajyrasyp ketken eken. Aqtóbe oblystyq İİD ókilderi kúdiktiniń oqıǵaǵa deıin burynǵy áıeliniń ata-anasyna kelip, burynǵy enesine pyshaq jaraqatyn salǵanyn shuǵyl túrde anyqtaǵan. Enesi aýyr jaraqat alǵan. Kúdikti ony óltiremin dep qorqytyp, kezdestirýin talap etken.
"Aqtóbe oblystyq İİD basshylyǵy, İİB jáne Aqtóbe prokýrory 5 saǵat boıy kelissóz júrgizip, kepilge alynǵan áıeldi bosatýyn suraǵan. Alaıda qylmysker talapty oryndaýdan bas tartqan. Onyń týystary da oqıǵa ornyna kelip, áıeldi bosatýyn suraǵan. Qylmysker bolsa kepildegi áıeldi óltiretinin aıtqan, onyń ornyna burynǵy áıelin ákelip berýdi talap etken. Ol burynǵy áıelin óltirýdi burynnan josparlaǵanyn málimdedi. Bes saǵat boıy júrgizilgen kelissóz nátıje bermegendikten jáne máseleni beıbit sheshý joldarynyń joqtyǵyn, al qylmyskerdiń mınýt saıyn ashýǵa berilgenin esepke ala otyryp, polısıa qyzmetkerleri túngi saǵat 12-de kepildegi áıeldi bosatýǵa arnalǵan kúsh fazasyn ótkizdi. Kúsh qurylymdary tabel qarýyn qoldanýy barysynda qylmyskerdiń kózi joıyldy. Kepildegi áıel zardap shekpedi, alaıda júıke kúızelisine ushyrady. Qazirgi ýaqytta oǵan dárigerler men psıhologtar kómek kórsetip jatyr", - dedi vedomstvodaǵylar.
Polısıanyń málimetinshe, Aqtóbe qalalyq İİB osy derekke baılanysty sotaldy tergeýdi bastaǵan.
