Búgingi tańda el arasynda qyzý talqyǵa túsip jatqan máselelerdiń biri – qazaqtyń qaragóz qyzdarynyń shetel azamattaryna turmysqa shyǵýy. Osyǵan qatysty pikirler taýsylar emes. Biri qoldap, qyzdarǵa baqyt tilese, endi biri qarǵap-sileýmen ýaqyttaryn ótkizýde. Baıqaǵanymyz – shetelge turmysqa shyqqan qazaq qyzdaryn kóbine er jigitter dattap jazǵan. Sondaı er jigitterge tilshi, bloger Órken Kenjebektiń aıtary bar eken. Óziniń Feısbýk paraqshasyndaǵy jazbasynda qyzdarymyzdyń shet elge turmysqa shyǵýyna erkekter ózimiz kinálimiz deıdi tilshi. Tolyq nusqasy tómendegideı:
«Baıqaımyn, dúkende turǵan djınsy shalbardyń kóbiniń eki balaqqa aırylar tusy óte tar. Aıyp etpeńizder, quddy atalyq múshesi joq erkekkindikke arnap tigilgen sekildi. Makaronshıkterdiń sáni me, masondardyń saıasaty ma, kim bilsin. Sony kıgen erkektiń de dene qyzýy óz uryǵyn kúıdirip - odan testosterony azaıyp - odan erkektigi joǵalyp - odan Feısbýkte qalaı arzan sóz, byljyr jazba jazǵanyn bilmeı qalady-aý.
Qyrtyp otyrmyn. Al shynyna kelsek, belgili telejýrnalısttiń jat ulttyń ókiline turmysqa shyqqanyn aıyptaǵan biraz post kórdim. Eger osydan jeti-segiz jyl burynǵy balań kezim bolsa, ıá, men de tilimdi sozyp turyp tilder edim. Biraq, qazir eshkimdi aıyptamaımyn. Úsh mysalmen túsindirip kóreıin.
Áriptesim boldy. Bir kabınette otyrdyq. Óte jaıdary, pysyq, tamasha qyz. Bizdiń aramyzda oǵan eshkim nazar aýdarmady ma, álde onyń talaby joǵary boldy ma, "jigiti" bolmady, anyq. Sodan shetel asyp, oqýǵa ketti. Sonda júrip, pákistandyqqa turmysqa shyqty. Balaly boldy. Oqýyn bitirgen soń elge qaıtty. Pákistandyq kúıeýbalany da qosa alyp keldi. Aıttym ǵoı, pysyq dep..
Áriptesim boldy. Otyzǵa deıin júrdi, shamasy. Qyzylordanyń ba, Shymkenttiń be, taza qazaqy tárbıesin kórgen qyzy. Jaqsy tanımyn. Sosyn jaqyn shetelge jumys babymen kóship bardy. Ýkraın azamatyna turmysqa shyqty. Qyzyn qazaq-ýkraın tilderine ortaq atpen atady. Turmysqa shyqqan soń eki-úsh ret kórdim, baqytty kádimgideı. Kúıeýin bılep alǵan, enelerdiń jargonymen aıtsaq, tórkinine páshki-páshki syılyq jiberip turady.
Áriptesim boldy. Sizder aıyptap jatqan qyz. Ol da biraz júrip qaldy. Biraq, bir erkektiń basyn qadirler, bir otbasyn gúldeter qaýqary baryna kámil edim - pysyq. Taǵy da sol, bizdiń jigitter murnymen Aı tirep júrdi me, álde kózimen Jer súzip júrdi me, áıteýir jóni túzý jan kezdespedi, shamasy. Endi basqa ulttyń ókili bolsa da, musylmanǵa turmysqa shyǵypty. Alla taǵala aq nekelerin baıandy etsin!
Iá, kez-kelgen qazaq qyzy úshin buljymas qaǵıda bar, kim bolsa da, musylmanǵa shyqqanyń abzal, abzal emes-aý, paryz. Al basqa jaǵdaıdyń bárinde sóz baltany alyp, olaı-bulaı sermegennen dym ózgermeıdi. Bárine kináli - ózimiz. Qazaq qyzy nege sheteldikke turmysqa shyǵyp jatyr degenge jaýapty byltyr Sıanǵa (Qytaı) barǵanda alyp edik. Qazaq stýdentteriniń dál osy pákistandyq ıa arab jigitterge turmysqa shyǵýy biraz eken. Nege dep bir-ekeýinen surasa bizdiń jigitter, "Sender dórekisińder. Olar áıeldi syılaı biledi. Jaýapkershiligi mol" dep jaýap beripti. Ne deısiń endi?
Sondyqtan, bar másele ózimizde. Erkektiń mysy ketti. Aıbary qashty. Jaýapkershiligi azaıdy. Endi ne isteý kerek? Osynyń bárin qaıtaraıyq ózimizge..
Al onyń eń birinshi tıimdi ári tegin joly - Feısbýkte qatynósek terip, boqtan ózgeniń bárin sóz qylýdy doǵarý, mýjıkı»
