Búgin QR Parlamenti Májilisindegi Úkimet saǵatynda Investısıalar jáne damý mınıstri Jeńis Qasymbek Astanada salynyp jatqan jańa áýejaı termınaly 1 maýsymda alǵashqy jolaýshysyn qabyldaıtynyn aıtty.

«2015 jyly «Nurly jol» memlekettik baǵdarlamasy aıasynda Astana áýejaıyndaǵy ushyp-qoný alaby qaıta jóndeýden ótý jobasy men jańa termınal qurylysy júzege asa bastady. Biz osy jyldyń 15 mamyrynda áýejaıdyń qurylysyn tolyǵymen aıaqtaýdy josparlaýdamyz. Ótken jyly Astana áýejaıy 3,5 mln jolaýshyǵa qyzmet kórsetken bolatyn. Jalpy 2016 jyly TMD elderi arasynda Astana, Almaty qalalarynyń áýejaıy úzdikterdiń qataryna kirdi», - dedi mınıstr.  Onyń aıtýynsha, «EKSPO» kórmesi aıasynda jańa termınal qosymsha 8 mln jolaýshyny qabyldaýǵa múmkindik beredi.