Elbasy tapsyrmasyna sáıkes QR Premer-mınıstriniń orynbasary – Aýyl sharýashylyǵy mınıstri Asqar Myrzahmetov bastaǵan Qazaqstan delegasıasy Izraıl Memleketine jumys saparymen bardy dep habarlaıdy "Qamshy" aqparattyq agenttigi QR ASHM Baspasóz qyzmetine silteme jasap.
Delegasıa quramynda memlekettik organdar men «Atameken» UKP, Ulttyq agrarlyq ǵylymı-bilim berý ortalyǵy jáne «QazaqstanInjınırıng», «Azyq-túlik kelisim shart korporasıasy» ulttyq kompanıalary, sondaı-aq, «Agrotehnologıa transferti jáne kommersıalızasıa ortalyǵy» JSHS ókilderi bar.
Jumys saparynyń basty maqsaty – Memleket basshysy N.Nazarbaevtyń «Qazaqstannyń úshinshi jańǵyrýy: jahandyq básekege qabilettilik» atty Qazaqstan halqyna Joldaýyndaǵy AÓK-ke shetelden ınvestısıa tartý boıynsha bergen tapsyrmalaryn júzege asyrý jáne eki jaqty tıimdi kelisimderge qol jetkizý.
Sapar aıasynda Qazaqstan delegasıasy Izraıl Memleketiniń aýyl sharýashylyǵy jáne aýyldyq aýmaqtardy damytý mınıstri, Knessettegi «Evreı úıi» partıasynyń depýtaty Ýrı Arıelmen kezdesti.
Kezdesý barysynda eki el arasyndaǵy kelisimge sáıkes 2017-2018 jyldarǵa arnalǵan aýyl sharýashylyǵy salasynda yntymaqtasý boıynsha Jol kartasyna qol qoıyldy.
Budan bólek, Qazaqstan aýmaǵynda komersıalyq negizdegi demonstrasıalyq ferma qurý boıynsha Deklarasıaǵa qol qoıyldy. Onyń kesheninde aýyl sharýashylyǵynyń ár alýan baǵyttary boıynsha tehnologıalardy tanystyrý josparlanýda.
Eki tarap Qazaqstan ónimderin Izraılge eksporttaý múmkindikterin talqylady. Atap aıtqanda, Izraılde qoı eti (keýdesi men quıryq maıy), jumyrtqa jáne ózge de ónimderge qajettilik bar. Eki jaqty kelisimniń endigi kezeńi bul ónimderge qatysty veterınarıalyq talaptar men standarttar máselelerine tirelip tur.
Investısıa tartý jáne otandyq ónimderdi eksporttaý jáne ınovasıalyq agrotehnologıalar transferti úshin «dóńgelek ústel» formatynda ızraıldik agrobıznes ókilderimen kezdesý bolyp ótti. Oǵan 20 kompanıa qatysty.
Sonymen qatar, delegasıa músheleri aýyl sharýashylyǵy salasyndaǵy jańa tehnologıalarmen aınalysatyn «Volcani center» ǵylymı-zertteý ınstıtýtyna bardy. Munda birikken zertteýler men jas mamandardy daıarlaý máseleleri qaraldy. Delegasıa múshelerin eksporttalatyn ónimder sapasynyń saqtalýy qatty qyzyqtyrdy.
Olar Izraıl tájirıbesin zerttep zerdeleý maqsatynda «Gevat-Haviva Rezervoir» sý resýrstaryn únemdeý jáne basqarý kompanıasy jumysymen de tanysty. Atalǵan kompanıa sý tazartýmen aınalysady jáne ony aýzy sý retinde paıdalanady. Aıta keteıik, sý baǵasy 1 kýb úshin 94 teńge.
Munan soń delegasıa músheleri kooperasıa quramyna kiretin otbasylyq sút fermasy men «Moshav Nıtsaneı Oz» mını irimshik qaınatý ortalyǵynyń qyzmetimen tanysty. Bul ferma tolyqtaı avtomattandyrylǵan. Onda 100 saýyn sıyr bar jáne jylyna 1 200 tonna sút beredi. Kúndelikti súttiń 300-350 lıtri irimshik óndirýge qalady. Al qalǵan bóligi Biryńǵaı Izraıl sút konsernine jetkiziledi.
Sonymen qatar, ferma irimshik ázirleýge baýlý synyptaryn ashqan. Budan áride bul ónimder dúkenderdiń sórelerine jóneltiledi.
A.Myrzahmetov atalǵan tájirıbeni elimizdegi aýyl sharýashylyǵy kooperatıvterin qurý barysynda paıdalaný kerektigin atap ótti. Izraılde kooperatıvter fermerlerdiń óz bastamalary boıynsha qurylady jáne memleket tarapynan qandaı da bir qoldaý bildirilmeıdi.
Osy fermany aralaý barysynda Qazaqstanda irimshik óndirý perspektvıalary boıynsha taldama jasaldy.
Sapar aıasynda jylyjaı men tamshylatyp sýǵarý zaýytyna baryp, «Netafim» kompanıasy (sýǵarý júıelerin óndirý, jylyjaı, landshaftyq jer óńdeý jáne t.b.) basshylyǵymen kelissózder júrgizildi.
