Reseı memlekettik dýmasynyń depýtaty Vıtalıı Mılonov 10 sáýirde dýma qaraýyna "Áleýmettik jeliler qyzmetin quqyqtyq retteý týraly" zań jobasyn usyndy. Jobada 14 jasqa deıingi balalarǵa "azamattyǵy qandaı ekenine qaramastan" áleýmettik jelilerdi qoldanýǵa tyıym salý qarastyrylǵan, dep habarlaıdy Azattyq.
Mılonovtyń bastamasy boıynsha, qoldanýshynyń jasyn anyqtaý úshin áleýmettik jelilerge jeke basyn kýálandyratyn qujat arqyly tirkeý kerek. Budan ózge, qoldanýshylar tirkelý kezinde oıdan shyǵarylǵan attardy paıdalana almaıdy. Sonymen qatar, zań jobasynda áleýmettik jelilerde qoldanýshynyń ruqsatynsyz oǵan qatysty jazbalardyń skrınshotyn taratýǵa da tyıym salynbaq.
Zań jobasynyń avtory áleýmettik jelilerdi ruqsat etilmegen mıtıńiler men sherýlerdi uıymdastyrýǵa paıdalanýǵa da tyıym salýdy usynady. Depýtat sonymen birge búdjettik mekemelerde de áleýmettik jelilerdi paıdalanýǵa tyıym salmaqqa nıetti.
Búgin budan buryn Búkilreseılik qoǵamdyq pikirdi zertteý ortalyǵy (VSIOM) áleýmettik jelini paıdalanýǵa qatysty júrgizgen saýalnamasynyń qorytyndysyn jarıalaǵan. Onyń nátıjeleri boıynsha, saýalnamaǵa jaýap bergenderdiń 52 paıyzy áleýmettik jelilerge jeke basyn kýálandyratyn qujatpen tirkelýge qarsy shyqqan. Degenmen, saýalnamaǵa qatysqandardyń 62 paıyzy 14 jasqa deıingi balalardyń áleýmettik jelilerdi qoldanýyna tyıym salýdy qoldap shyqqan.
