Eýrazıalyq Top (ERG) Qostanaı oblysynda stýdenttik ortada jastar kásipkerliginiń ekojúıesin qurý jobasyn qolǵa aldy. Kompanıanyń tyń bastamasy stýdenttik kásipkerlikti damytýǵa arnalǵan dóńgelek ústel barysynda kópshilikke tanystyryldy dep habarlaıdy "Qamshy" aqparattyq agenttigi.
Talqylaýǵa Eurasian Resources Group, Aımaqtyq kásipkerler palatasynyń dıreksıasy, Qostanaı oblysynyń ákimdigi, bilim basqarmasy, respýblıkalyq jáne oblystyq birlestikter, aımaqtaǵy joǵary oqý oryndary men jergilikti bıznes qaýymdastyǵynyń ókilderi qatysty.
Eýrazıalyq Top keleshek 4.0 ındýstrıasynyń negizgi qateri – halyqty eńbekpen qamtý dep bilip, osy túıtkildi istiń túıinin tarqatý úshin tyń sheshim – shaǵyn qalalardaǵy belsendi ári isker jastardy damytýdy usynyp otyr. Osy oraıda, bıznesti júrgizýdiń áleýmettik jaýapkershiligi qaǵıdalaryna súıenetin ERG kompanıalary ózderi ornalasqan óńirlerdegi joǵarǵy oqý oryndarynyń kásipkerlik baǵytqa ıkemdelip, transformasıalanýy qolǵabys etip, «Stýdenttik ortada jastar kásipkerliginiń eko-júıesin qurý jobasyn» júzege asyra bastamaq. Erterekte bul bastama Aqtóbe óńirinde kópshilikke tanystyrylǵan bolatyn.
Jańa baǵdarlama degenimiz seriktes ýnıversıtetterdi qarjylandyrý emes. Kerisinshe, ERG oqytý trenıńteri men kýrstaryna jetekshi koýchterdi tartyp, jumyldyrý mindetin óz moınyna alady. Belsendi stýdentterge mentorlardy belgilep, jalyndy jastarǵa óz ıdeıalarynyń ekonomıkalyq tıimdiligin esepteý daǵdylaryn úıretedi. Qajet bolǵan jaǵdaıda ǵımarattaryn tehnoparkter men zerthanalardyń qajetine berip, barynsha septespek.
– Jastardyń basym bóligi qazir turaqty túrde qalaı da memlekettik basqarý organdary men óńirdegi iri kásiporyndarǵa jumysqa turýǵa umtylady. Osy jaǵdaıdy ózgertý úshin erte kezden, ıaǵnı jastar joǵary oqý ornynda bilim alyp júrgen kezden-aq aralaryndaǵy iskerlik qabileti joǵarylaryn anyqtap alǵan jón. Sosyn olardy yntalandyrý sesıalary men sarapshylardyń damytý konsýltasıalaryna tartý kerek. Olardyń bıznes ıdeıalaryn jetildirip, bıznes-josparlaý jáne bıznes jobalaý formattaryna kóshýine jol ashatyn alańdar qalyptastyrý kerek. Investısıalyq jáne kásipkerlik ınfraqurylymdaryna jastardyń bastamalaryn qosýdy qamtamasyz etý qajet. Biz bul bastamany qolǵa alǵanda jastardyń kásipkerligin damytý ózimizdiń týǵan qalalarda shaǵyn jáne orta kásipkerlerlikti damytýǵa myǵym tuǵyr bola alatynyn kórip otyrmyz. Onyń ústine bul ekonomıkanyń ınovasıalyq áleýmetin arttyrýǵa tyń serpin beredi, – dedi Eýrazıalyq Toptyń personal jáne áleýmettik jumys jónindegi basqarýshy dırektory Irına Dáýletbakova.
– Biz júzege asyra bastaǵan bul joba Elbasynyń halyqty kásipkerlikke keńinen yntalandyrý tapsyrmasyn oryndaýǵa baǵyttalǵan, – dedi Qostanaı oblystyq kásipkerler palatasynyń dırektory Murat Ábenov. – Óz kezegimizde biz naqty bıznes-ıdeıalary bar azamattarǵa aqparattyq jáne servıstik qoldaý kórsetýge ázirmiz. ERG-diń bul bastamasy aımaqtaǵy shaǵyn jáne orta bıznestiń úles-salmaǵyn arttyrýǵa sep bolaryna senimdimin.
ERG–diń stýdenttik kásipkerlikti qoldaýǵa baǵyttalǵan qanat qaqty jobasy S.Toraıǵyrov atyndaǵy Pavlodar memlekettik ýnıversıteti bazasynda sátti synaldy. İlkimdi iske Tel-Avıv Ýnıversıteti (TAÝ) men Qazaqstandaǵy Tel-Avıv Ýnıversıteti dostarynyń qaýymdastyǵy septigin tıgizdi. Nátıjesinde bastamanyń ómirsheńdigi men ózektigini aıqyn ańǵaryldy.
Baǵdarlamanyń tusaýkeserinen keıin ERG jobasyna qatysatyn, irikteýden ótken joǵarǵy oqý oryndary-seriktester tizimi jarıalandy.
