Qazaqstan Respýblıkasynyń Bas Prokýrory Jaqyp Asanov Avstrıaǵa jumys saparymen bardy. Delegasıa quramynda Quqyq qorǵaý organdary akademıasy rektorynyń mindetin atqarýshy Naıl Ahmetzakırov boldy dep habarlaıdy "Qamshy" aqparattyq agenttigi Bas prokýratýranyń janyndaǵy Quqyq qorǵaý organdary akademıasynyń baspasóz qyzmetine silteme jasap.
Sapar barysynda Jaqyp Asanov BUU Bas Hatshysynyń orynbasary Iýrıı Fedotovpen ózara túsinistik týraly memorandýmǵa qol qoıdy.
Iý. Fedotov jasalyp otyrǵan kelisimniń mańyzyna erekshe mán berip: «Bul biz úshin mańyzdy oqıǵa. Sebebi ol Ortalyq Azıa óńiri elderine ekstremızm men terorızmnen, transulttyq uıymdasqan qylmystylyqtan týyndaıtyn álemdik qaýiptermen kúreste, qaýipsizdik pen turaqtylyqty saqtaýda óziniń kúsh-qýatyn qalpyna keltirýge múmkindik beredi. Biz Qazaqstanǵa qoldaý kórsetip otyrǵany úshin alǵysymyzdy bildiremiz, osy baǵytta birigip jumys jasaıtyn bolamyz», - dep atap ótti.
Bul qujat neni biliredi?
Qazaqstan Bas prokýratýrasynyń Quqyq qorǵaý organdary akademıasy bazasynda Óńirlik Hab qurylýda.
Bul quqyq qorǵaý jáne arnaıy organdardyń qyzmetkerleri bes jahandyq qaýipke qarsy is-qımyldyń aldyńǵy qatarly álemdik tájirıbesi men ozyq tehnologıalaryn úırenetin Ortalyq Azıadaǵy biryńǵaı alań. Olar:
1) ekstremızm men terorızm;
2) esirtki men qarýdyń zańsyz aınalymy;
3) adam saýdasy;
4) kıberqylmystylyq;
5) sybaılas jemqorlyq.
Osy bes baǵyt boıynsha bizge sheteldiń úzdik oqytýshylary keletin bolady.
Budan bólek, Óńirlik Habty qurý Ortalyq Azıa elderiniń quqyq qorǵaý organdarymen birlesken zertteýler júrgizýge múmkindik beredi.
Sapar barysynda Bas Prokýror EQYU-nyń Bas hatshysy Lamberto Zanermen kezdesti.
Jaqyp Asanov Qazaqstan men EQYU-nyń ózara árekettesý deńgeıin joǵary baǵalady. Bizdiń elimiz Uıymmen halyqaralyq qaýipsizdikti nyǵaıtýdyń barlyq mańyzdy qyrlary boıynsha, eń aldymen, qazirgi zamanǵy qaýip-qaterlermen kúres salasynda yntymaqtasýda, dedi ol.
Taraptar jahandyq qaýip-qaterlerge qarsy óńirlik hab qurý aıasyndaǵy yntymaqtastyqtyń negizgi baǵyttaryn talqylady.
Kezdesýdiń nátıjelerin qorytyndylaı kele EQYU basshysy jobany jyljytýǵa yqpal etýge daıyn ekenin bildirdi. «Bizge zorlyq-zombylyq sıpatyndaǵy ekstremızm, esirtki bıznesi, sybaılas jemqorlyq, zańsyz kiristerdi jylystatýmen kúreste kúsh biriktirý kerek. Sondyqtan Akademıanyń hab qurý bastamasy óte oryndy jáne ózekti. Bul ıdeıa EQYU tarapynan tolyqtaı qoldaý tabady. Osy maqsatta bizder halyqaralyq sarapshylar qaýymdastyǵynyń úzdik tájirıbesin tartýymyz kerek», dep atap kórsetti L.Zaner.
Sondaı-aq Bas Prokýror Sybaılas jemqorlyqqa qarsy halyqaralyq akademıanyń rektory Martın Króıtnermen kelissóz júrgizdi. Olar eki akademıanyń aldynda turǵan maqsattar men mindetterdiń ortaq ekenin atap ótti jáne ózara tıimdi yntymaqtastyq ornatýǵa qyzyǵýshylyq tanytty.
Sonymen qatar J.Asanov Avstrıada bilim alyp júrgen qazaqstandyq stýdenttermen kezdesti. Bas Prokýror ınstıtýsıonaldyq reformalardy júzege asyrý boıynsha jasalyp jatqan jumystar, prokýratýrany jańǵyrtý jáne kadrlyq quramdy sapaly jańartý jónindegi sharalar týraly aıtyp ótti jáne stýdentterdiń suraqtaryna jaýap berdi.
