Túrkıa prezıdenti Rejep Taıyp Erdoǵan jaqyn ýaqytta ólim jazasy jaıynda máseleni qaıta kóteretinin málimdedi, dep jazady Qamshy aqparattyq agenttigi.

Túrik kóshbasshysy bul jaıynda Ystambuldaǵy rezıdensıasy aldyna jınalǵan halyqtyń aldynda ýáde etti.

Ystambulda ózine qoshemet bildirgen halyq aldynda sóz sóılegen Erdoǵan premer-mınıstr Bınalı Iyldyrymmen jáne ultshyl opozısıa kóshbasshysymen ólim jazasyn qaıtarý máselesin «dereý» talqylaıtynyn málim etti.

Atap ótilgendeı, mundaı qadam Túrkıanyń Eýropalyq odaqqa ený týraly kelissózderiniń oń nátıjesiz qalatynyn bildirer edi. Jeksenbi, 16 sáýir kúni ótken referendýmda Túrkıa konstıtýsıasynyń 18 babyna ózgerister engizý qajet pe degen másele qaraldy.

 Halyq ózgeristerdi quptaǵan jaǵdaıda premer-mınıstrdiń qyzmeti qysqaryp,  prezıdent vıse-prezıdentter men mınıstrlerdi, joǵary laýazymdy sheneýnikterdi óz erkimen taǵaıyndaı alady. Odan bólek, prezıdent tótenshe jaǵdaı jarıalaý jáne parlamenttiń basym daýsymen ǵana kúshi joıylatyn jarlyqtardy shyǵarý quqyǵyna ıe bolady. Resmı derekterge sáıkes, búletenderdiń 98 paıyzyn óńdeý qorytyndysy boıynsha, daýys berýshilerdiń 51,3 paıyzy ózgeristerdi engizýdi quptaǵan, al 48,59 paıyzy qarsy daýys bergen.