Tún. Tús kórip jatyrmyn, oıatpańdarshy!!!
«Búrkittiń quıasy túsetinin estigen edik, qurqyltaı da bolsyn ba»,-dep otyrǵandar qyran-topan dý kúldi. Biraq zildi emes.
Jas aıyrmashylyǵyn eskersek aıqara qarys altylyq bar, talqylyq joq. Ótpeli dúnıeniń jolaıyryǵyna jetken de bireýi taýǵa tartty, ekinshisi sol qalpynda túsinen jańylmaǵan keıpinde daýǵa tartty...jo, jo, joq. Záýdeǵalam alda-jalda oıpyl-toıpyl bolsa, kimniń qaı jaqqa tanaýy jelbireıtinin ýaqyt anyqtar. Ony ómir kartınasy ózi syzyp meńzeýge álek. Túlen túrtken de aǵadan qaıyr bolǵan ba? Bolsa kórelik.
Jópeldeme de jasalǵan tosyn sheshim tizeden qaǵyp, aq bas taýdan shań shyǵarsa, júrek qaıda baryp kúneltsin. Báribir keýdeden qashyp kete almaı týlaıdy. Týlap-týlap turalap qalady. İle sala quzǵyndar shýlaıdy. Biraq syrttaǵy yzǵyryqtyń juqa qabyrǵadan túıregende jan murnnyń ushyna jeter, sonda da shydaýǵa týra keledi. Kelmeı lajyń joq...
Qozy kósh jerden kórgen nárseni moıynymen nusqaý, bilgen nárseni bes kún arqalaýǵa týra keletin qıa bettiń kishi shuqanaqtary. Karizdiń qyltanaqtary qaýlaıdy beıopa dúnıe. Qıamet demeı tura-turalyq, sabyr bar ǵoı!
Súıegi juqaryp jubyna jetkende basyńa qusy sańǵyryp, moıynyńa tyshqan minip alatyn bolsa baqyttyń qulaǵy. Jeti tarazy- oı, aqyl, sana, kóz, túısik, sezim, júrek bolyp ekshegen qatelik pen qaralyqtyń bári mızam tarazysynda óziniń quny men obalyn, saýabyn alady. Ol kezde tym kesh...
Qos janary ózin jetelep áreń júrgende kórgeni mynaý, sónip ketse she, báriniń aýyzyna qum quıylar. Qara basyna ne kórindi. Ony sarsańǵa túsip dáleldeýdiń paıdasy soqyr tıyn. Túnde qalǵymaǵan, kúndiz ańdymaǵan kóleńke qaldy ma? Sońynda qý súlderin súıretken bir shoǵyr lap qoıyp keledi. Olardyń júregi joq, qultemirge aınalǵan miskinder. Biraq, ótirik pen qaralyqty jasaǵysy kelse aıshylyq jerden aıla tabady. Shyndyqqa kelgende qaılasyz qalady. Endi ne deısiń?
Men onymen at kekilin kesisip, beldikti sheshisip kettim, mahabbattyń túbine jettim. Soıyldyń dúminen óttim, ajyrap qalǵan ar, qojyrap qalǵan sor. Sonda ol ne tapty... Bar bolǵany shańyraq shaıqaldy, qurqyltaı ushyp ketti.
Tań esinep jatyrmyn qoıa turyńdarshy!!!
Kógedaı SHÁMERHAN
Sýretti jasaǵan: Baqtıar Aıtáli
