Senat depýtaty, Qarjy jáne búdjet jónindegi komıtettiń múshesi Sergeı Ershov Qazaqstannyń 2050 jyly álemniń damyǵan 30 memleketiniń qataryna enetinine kúmán keltirdi, - dep habarlaıdy Tengrinews.kz. "2016 jyly memlekettik organdardyń strategıalyq jospary bolyp bekitilgen 479 arnaýly ındıkatordyń 372-sine ǵana nemese 78 paıyzyna ǵana qol jetkizdik. Arnaýly ındıkatorlardyń 83-i DEF básekege qabilettilik jahandyq ındeksiniń ındıkatory bolyp sanalady, onyń 39 paıyzy ǵana oryndalǵan. Asa nazar qoıyp aıta ketkim keletini, DEF memleketterdiń básekege qabilettiliginiń jahandyq reıtıńin júrgizedi, al Memleket basshysy Qazaqstan 2050 jyly damyǵan 30 eldiń qataryna kirýi kerek ekenin naqty aıtty. Bul jaǵdaıda osy merzimge tapsyramanyń barlyǵyn oryndaı alatynymyzǵa kúmán kóp", - dedi senator Parlament palatalarynyń birikken otyrysynda 2016 jyldyń respýblıkalyq búdjetiniń oryndalýyn talqylaý barysynda.
Ershov mundaı jaǵdaılardy boldyrmaý úshin úkimettiń qajetti sharalardy qabyldaýy kerek ekenin aıtyp ótti. Sol sharalardyń biri árbir ındıkator boıynsha oryndaýǵa jeke jaýapkershilikti bekitý, sondaı-aq, olardyń ózektiligin, ádildigin jáne júzege asyrylýyn anyqtaý. "Búdjet baǵdarlamalary búdjet qarajatyn ıgerýdi sıpattaıdy. Alaıda búdjet naýryzda jáne qazanda eki ret naqtylansa, ıgerýdiń sapasyna baǵa berý qıyn. Respýblıkalyq búdjetti iske asyrýǵa qabyldanǵan úkimet qaýlysy 31 ret ózgerdi. 17 ózgeris tórtinshi toqsanda boldy. Bir kúntizbelik merzimge ózgeris engizý týraly 2-3 qaýlydan keledi. Esep komıtetiniń pikirimen kelisemiz, olar mundaı derekterdiń respýblıkalyq búdjetti iske asyrý prosesin aıtarlyqtaı qıyndatyp otyr dep úkimet qaýlysyn túzetýge júıeli talqylaýdyń joqtyǵyn aıtqan", - dedi Ershov.
Buǵan qaramastan, senatordyń aıtýynsha, parametrler túzetilgennen keıin búdjet qarajatyn oryndaý 100 paıyzǵa jetpegen - 99,1 paıyzǵa nemese 8,8 trıllıon teńgege oryndalǵan. "2015 jylmen salystyrǵanda tabys 25 paıyzǵa ósti, buǵan ne sebep? Saraptamadan tabystyń ósýine ulttyq valútanyń devalvasıasynyń róli basym bolǵanyn anyqap otyrmyz", - deıdi ol. Senator búdjet qarajatynyń ıgerilmegen aıtarlyqtaı somasy, birinshiden, shyǵyndy egjeı-tegjeıli josparlaýdy, ekinshiden, búdjettiń josparly kórsetkishterin jaýapkershilikpen oryndaýdy talap etetinin kórsetken. Munymen qatar, Ershov memlekettik satyp alý salasyndaǵy kiltıpandardy atap ótip, bul salada 2 mıllıard teńge shyǵyn bolǵanyn naqtylady. "Bul derekter osy salada tártiptiń joqtyǵyn, normatıvtik-quqyqtyq bazanyń álsiz ári ony ábden pysyqtaý kerek ekenin kórsetti. Úkimettiń osy jaǵdaıdy túzeý boıynsha qabyldap otyrǵan sharalarynan áli kúnge jaǵymdy áser bolmady", - dep qorytyndylady senator oıyn. Ol memlekettik syńaıly sektordyń qyzmetin baǵalaýdyń biryńǵaı sharttary jaıynda aıtty. Aıtýynsha, bul sharttar osy saladaǵy shynaıy jaǵdaıdy kórsetip otyr. "Memleket memlekettik syńaıly sektorǵa tıimdi basqarýshy retinde zor úmit artyp otyr, alaıda, bizdiń oıymyzsha, bul úmit aqtalmaı otyr", - deıdi Ershov. Senator osy eskertýlerdi aıta kele úkimet pen Esep komıtetiniń jaýabyn qoldap, 2016 jylǵy respýblıkalyq búdjetin bekitýdi usyndy.
