Qorǵanys jáne aeroǵarysh ónerkásibi mınıstri Beıbit Atamqulov Qaraǵandy oblysynda zymyran qulaǵannan keıin shyqqan órt úshin Reseıdiń ótemaqy tólemeıtinin aıtty, - dep habarlaıdy Qamshy aparattyq agenttigi Tengrinews.kz saıtyna silteme jasap.

"Órtti sóndirýge baǵyttalǵan jumystardyń barlyǵy jasaldy. Sizder mundaı jaǵdaılardyń jylyna 2-3 ret bolatynyn eskermeı otyrsyzdar. Onymen qosa, órt shóleıtti aýmaqta boldy, kún óte ystyq. Órtti sóndirýge qatysty sharalarǵa ketken shyǵyndy reseılik tarap aldy. Olar barlyq shyǵyndy tolyqtaı japty", - dedi mınıstr.

Atamqulovtyń aıtýynsha, Qazaqstan órt úshin ótemaqy talap etpeıdi.

"Ol jaqta tek shóp órtenip ketti", - dedi mınıstr.

Beıbit Atamqulov tótenshe jaǵdaıdan qaza tapqan er adamnyń otbasyna jáne zardap shekkenderge qandaı ótemaqy beriletinin naqtylamady. 

"Roskosmos" ókilderi kórsetetin kómektiń somasy ázirshe talqylanyp jatyr, ony aıta almaımyn. Ol Reseı Federasıasynyń búdjeti ǵoı. Kómektiń barlyǵyn reseılik tarap kórsetedi, sebebi qaza tapqan er adam reseılik kásiporynnyń jumysshysy bolyp sanalady. Sol jaqtan jalaqy alyp júrdi, saqtandyrýy jáne taǵy basqasy", - dedi mınıstr.

Eske sala keteıik, 14 maýsymda  keshki ýaqytta qoldanýshylar WhatsApp messendjeri arqyly Jezqazǵan mańyndaǵy Talap aýylyna zymyran qulaǵany týraly habar taratqan bolatyn. Habarlamada qırandyda geptıl (adam ómirine óte qaýipti hımıalyq ýly zat) bar delindi. Aýyl turǵyndaryna esik pen terezelerdi jabý kerektigi jáne balalardy kóshege shyǵarmaý týraly eskertý jasalǵan bolatyn. Sondaı-aq, osyǵan deıin Jezqazǵan mańyna qulaǵan zymyran qırandysynda qaterli geptıl joq ekeni aıtylǵan edi. 

Sonymen qatar,  zymyran qırandysy qulaǵan jerde bir adamnyń qaza tapqany jaıly habarlanǵan bolatyn. Al keıinirek Roskosmos Jezqazǵan mańyndaǵy qaıǵyly oqıǵaǵa baılanysty pikir bildirgen edi. Olardyń aıtýynsha, órtke qatty soqqan jel sebep bolǵan. "Aýyr meteojaǵdaılarǵa baılanysty halyq turmaıtyn aýmaqta órt shyqty. Adamdarǵa esh qaýip tónip turǵan joq, órt sóndirildi", - degen edi Roskosmos ókilderi.